काष्ठमण्डप पुन:निर्माण ६० प्रतिशत सम्पन्न

होमल्याण्ड खबर

२०७७ असार २६ गते, शुक्रबार १०:१५ मा प्रकाशित

काठमाडौं । २०७२ वैशाख १२ गतेको महाभूकम्पबाट पूर्ण रुपमा क्षति भएको राजधानीको वसन्तपुरस्थित काष्ठमण्डपको पुन:निर्माणको काम ६० प्रतिशत सम्पन्न भएको छ । ढिलो निर्माण कार्य गरी सुरु गरिए पनि पछिल्लो समय काष्ठमण्डप निर्माण कार्यले गति लिएको छ । काष्ठमण्डप पुन:निर्माणमा हालसम्म करिब ७ करोड रुपैयाँ खर्च भइसकेको छ भने करिब ६० प्रतिशत निर्माण कार्य सम्पन्न भएको काष्ठमण्डप पुन:निर्माण समितिले जनाएको छ ।

काठमाडौं महानगरपालिका मार्फत उपभोक्ता समितिले भूकम्पबाट क्षतिग्रस्त भएको काष्ठमण्डपको पुन:निर्माणको काम गरिरहेको छ । पुन:निर्माणको काम विवादमा पर्दा तीन वर्षसम्म निर्माण कार्य सुरु हुन सकेको थिएन् । तर काठमाडौं महानगरपालिकाले १५ सय वर्ष पुरानो मौलिक प्रविधि अपनाएर स्वदेशी सीप, पूँजी, प्रविधि र श्रमलाई प्रयोग गरी ३ वर्षभित्र बनाउने गरी २०७४/०७५ को नीति तथा कार्यक्रममा समावेस गरेपछि भने पुन:निर्माणको कामले गति लिएको थियो ।

काष्ठमण्डप पुन:निर्माण समितिका अध्यक्ष एवं बागमती प्रदेशका सांसद राजेश शाक्यले पुन:निर्माणको काम करिब ६० प्रतिशत सम्पन्न भएको जानकारी दिनुभयो । काष्ठमण्डपको पहिलो तलाको काम सम्पन्न भई दोस्रो तलाको काम भइराखेकाले ६० प्रतिशत काम सम्पन्न भएको उहाँको अनुमान छ । यस्तै पुरातत्व विभागले ‘स्टिमेट’ गरेको १९ करोड ८८ लाख रुपैयाँ लागत भित्रै रहेर पुन:निर्माणको काम सम्पन्न हुने पनि शाक्यले बताउनुभयो । अहिलेसम्म काठमाडौं महानगरपालिकाको झण्डै १० करोड ५० लाख रुपैयाँ अनुदानबाट पाएको र करिब ७ करोड रुपैयाँ खर्च भइसकेको जानकारी उहाँले दिनुभयो ।

महानगरपालिकाको नीति तथा कार्यक्रममा ३ वर्षभित्र सम्पन्न गर्ने लक्ष्य राखेकाले लकडाउनको अवधिमा पनि निर्माण कार्यलाई नरोकिएको शाक्यको भनाइ छ । उहाँले भन्नुभयो, ‘बसन्तपुर दरबार क्षेत्रभित्र रहेका अन्य सम्पदाको काम पनि व्यवस्थित रुपमा भइराखेको र सबै सम्पदाको पुननिर्माण १५ सय वर्ष अघिको प्रविधिमा रहेर भूकम्प प्रतिरोधि बनाउने प्रयास गरिएको छ ।’

काष्ठमडण्प पुन:निर्माणका लागि चाहिने थाम, ढुंगा सबै व्यवस्थापन गरी तयार भइसकेको पनि शाक्यले जानकारी दिनुभयो । पहिलो तलामा ९६ वटा थामको प्रयोग गरिएको छ । उपभोक्ता समितिले नै पुन:निर्माणको काम गरिरहेकाले स्थानीयबाट कुनै अवरोध नभएको पनि उहाँले बताउनुभयो । अहिलेकै गतिमा काम भए तोकिएको समय अवधिभित्रै निर्माण सम्पन्न हुने उहाँको भनाइ छ ।

सम्बन्धित खबर

अस्ट्रेलियाको राजदूतमा चित्रलेखा यादव नियुक्त

प्रतिनिधिसभाका सचिव सुरेश अधिकारीको राजीनामा स्वीकृत

सेयर बजार २६६७ अंकमा झर्‍यो, घट्यो कारोबार

एमालेले लिन मानेन काठमाडौं महानगरको जरिवाना पत्र

कांग्रेस कोषाध्यक्षमा उमेश श्रेष्ठ मनोनीत

रविमाथि अनुसन्धान गर्न १५ दिन म्याद थप