४ जेष्ठ २०८३, सोमबार
२०७८ भाद्र २२ गते, मंगलवार ११:१३ मा प्रकाशित
सरकारले दार्चुलामा तुईनबाट खसेर जयसिंह धामी बेपत्ता भएको घटना र नेपाली आकाशमा अनाधिकृत रुपमा भारतीय हेलिकप्टर उडाएको विषयमा भारतलाई कूटनीतिक नोट पठाएको छ । दुवै नोट कूटनीतिक च्यानल मार्फत पठाइएको परराष्ट्र मन्त्रालय स्रोतले जानकारी दिएको छ ।
गत साउन १५ गते तुईनबाट महाकाली नदी तर्ने क्रममा भारतीय सीमा सुरक्षा बल (एसएसबी)ले तुई काटिदिँदा जयसिंह धामी महाकाली नदीमा खसेर बेपत्ता भएका थिए । घटनापछि नेपालमा भारतको चर्को विरोध हुँदै आइरहेको छ । सरकारले घटना छानबिनका लागि समितिसमेत गठन गरेको थियो ।
गृह मन्त्रीस्तरीय निर्णयअनुसार घटनाको स्थलगतरूपमा छानबिन गरी सत्यतथ्यसहित प्रतिवेदन पेस गर्न गृह मन्त्रालयका सहसचिव जनार्दन गौतमको संयोजकत्वमा पाँच सदस्यीय छानबिन समिति गठन गरिएको थियो ।
जसमा नेपाल प्रहरीका नायब महानिरीक्षक पूरुषोत्तम कँडेल, राष्ट्रिय अनुसन्धान विभागका अनुसन्धान निर्देशक हुतराज थापा, सशस्त्र प्रहरी बलका प्रहरी वरिष्ठ उपरीक्षक सुरेशकुमार श्रेष्ठ र जिल्ला प्रशासन कार्यालय दार्चुलाका सहायक प्रमुख जिल्ला अधिकारी ज्योत्सना भट्ट सदस्य रहेका थिए ।
समितिले गत १५ गते सरकारलाई प्रतिवेदन बुझाएको थियो । छानबिन समितिले पनि घटनामा भारतीय एसएसबीको संलग्नता रहेको प्रतिवेदन सरकारलाई बुझाएको थियो । समितिले यो विषयमा भारतसँग कूटनीतिक तवरबाट छलफल गर्न सुझावसमेत दिएको थियो ।
यस्तै यहि घटनाकाबीच भारतीय हेलिकप्टर नेपाली भूमिमाथि उडिरहेको भिडियो पनि सार्वजनिक भएको थियो । जसलाई लिएर पनि भारतको नेपालमा चर्को विरोध भइरहेको छ । गत १८ गते लगातार केहि दिनदेखि भारतीय हेलिकप्टर नेपाली आकाशमा उडिरहेका तस्वीर तथा भिडियो सार्वजनिक भएको थियो ।
तुईन प्रकरणमा सरकारले चासो दिएर समिति गठन गरेपछि भारतले नेपालमा नेपाली आकाश नै प्रयोग गरेर निगरानी गरिरहेको स्थानीयले बताएका छन् ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
