९ मंसिर २०८१, आईतवार
२०७८ पुष २५ गते, आईतवार १२:३८ मा प्रकाशित
महालक्ष्मी विकास बैंक लिमिटेडले सञ्चालक निर्वाचनको कार्यक्रम हाललाई स्थगित गरेको छ । बैंकले पुस २५ गते का लागि आयोजना गरेको २०औं वार्षिक साधारण सभामार्फत निर्वाचन गर्ने तयारी गरेको ६ जना सञ्चालकहरुको निर्वाचन कार्यक्रम स्थगित गरेको हो ।
सभाले संस्थापक तर्फको तीन जना र सर्वसाधारण तर्फको तीन जना सञ्चालक निर्वाचनको कार्यक्रम तय गरेको थियो । बैंकका शेयरधनीहरु गिरिराज पोखरेल र प्रमोद श्रेष्ठले उच्च अदालत पाटनमा निवेदन दिएको बैंकले जानकारी दिएको छ । उक्त निवेदन उपर माघ ३ गते छलफल पेशी तोकिएकाले सो अवधिसम्म निर्वाचनको बाँकी काम कारवाही नगर्ने निर्णय बैंकले गरेको हो । उच्च अदालतको अन्तरिम आदेशलाई पालना गर्दै अर्को निर्णय पछि मात्र निर्वाचनको कार्यक्रम अघि बढ्ने जानकारी बैंकले दिएको छ ।
यद्यपी वार्षिक साधारण सभाका अन्य प्रस्ताव पनि तोकिएकै अविधिभित्र पारित हुनेछ । बैठकले आर्मी अफिसर्स क्लब , भद्रकाली, काठमाडौंमा विहान ११ बजे सभा बोलाएको हो । सभाले गत आर्थिक वर्ष ०७७÷७८ सम्मको वार्षिक प्रतिवेदन सहितका वित्तीय विवरणहरु पारित गर्नुका साथै चालू आवको लागि लेखापरिक्षक नियुक्ती र निजको पारिश्रमिक निर्धारणको विषयलाई पनि टुङ्ग्याउनेछ । यस वर्ष बैंकले कुल २१ दशमलव शून्य ५३ प्रतिशत लाभांश प्रस्ताव गरेको छ ।
बैंकको मंसिर १२ गतेको सञ्चालन समितिको बैठकले हाल कायम चुुक्तापूँजीको आधारमा २० प्रतिशत बोनस शेयर र कर प्रयोजनका लागि १ दशमलव शून्य ५३ प्र्रतिशत नगद लाभांश वितरणको प्रस्ताव गरेको हो । हाल कम्पनीको चुक्तापूँजी रू. ३ अर्ब ३४ करोड २४ लाख २ हजार रहेको छ ।
यस वर्ष बैंकले हालसम्मकै उच्च लाभांश प्रस्ताव गरेको हो । यस अघि आर्थिक वर्ष ०७५÷७६ को मुनाफाबाट बैंकले ८ प्रतिशत बोनस शेयर र कर प्रयोजन समेत ९ दशमलव ८९ प्रतिशत नगद लाभांश गरी कुल १७ दशमलव ८९ प्रतिशत लाभांश वितरण गरेको थियो । गत वर्ष भने बैंकले ८ दशमलव ८ प्रतिशत बोनस शेयर र कर प्रयोजनका लागि शून्य दशमलव ४६ प्रतिशत गरी कुल ९ दशमलव २६ प्रतिशत लाभांश वितरण गरेको थियो । साधारण सभा प्रयोजनका लागि बैंकले पुस १३ गते एक दिन बुक क्लोज गरेको छ । बुक क्लोजको आधारमा पुस १२ गतेसम्म कायम शेयरधनीहरु मात्र सभामा भाग लिन र लाभांश प्राप्त गर्न योग्य भएका छन् ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
