९ मंसिर २०८१, आईतवार
२०७९ पुष १४ गते, बिहीबार १२:३६ मा प्रकाशित
उपकप्तान रोहित पौडेलको उत्कृष्ट ब्याटिङमा विराटनगर सुपर किंग्सले नेपाल टि२० लिगमा पोखरा एभेन्जर्समाथि ८ विकेटको सानदार जित हात पारेको छ । यता पोखरा लगातार पाँचौं खेलमा पराजित भएको छ ।
जितको लागि १ सय ३६ रनको विजयी लक्ष्य पछ्याएको विराटनगरले १८.४ ओभरमा २ विकेट गुमाउँदै पूरा गर्यो । विराटनगरको जितमा रोहित पौडेल ५७ बलमा ६ चौका र ३ छक्कासहित ७१ रनमा अविजित रहे ।
रोहित जारी टि२० लिगमा अर्धशतक प्रहार गर्ने तेस्रो नेपाली खेलाडी हुन् । समग्र नेपाल टि२० लिगको १० औं अर्धशतक हो । यसअघि पोखरा एभेन्जर्सका कुशल मल्लले लुम्बिनी अल स्टार्सविरुद्ध ६१ र आसिफ शेखले जनकपुर रोयल्सविरुद्ध ५० रनको इनिङ खेलेका थिए ।
ओपनर अर्जुन साउद रोयल डक आउट भएका थिए । तर दोस्रो विकेटका लागि रोहित र गौरांशु शर्माले ७८ रनको साझेदारी गर्दै सहज जितको आधार तय गरेका थिए । गौरांशु ३२ बलमा २ चौका र १ छक्कासहित ३३ रनमा जाहिर खानको बलमा बोल्ड भए । हुसेन तालत २३ बलमा ३ चौकासहित २८ रनमा अविजित रहे । पोखराका आमिर हाम्जा र जाहिर खानले एक एक विकेट लिए ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको पोखराले निर्धारित २० ओभरमा ६ विकेट गुमाउँदै १ सय ३६ रन बनायो । पोखराका आमिर हाम्जा २५ बलमा १ चौका र ३ छक्कासहित सर्वाधिक ३७ रनमा अविजित रहे । पोखराले आजको खेलमा आरिफ शेखलाई बेन्चमा राख्दै कृष्ण कार्कीलाई खेलाएको छ ।
ओपनर सुमित महर्जन २५ बलमा २ चौका र १ छक्कासहित २६ रनमा आन्द्रे म्याकार्थीको बलमा कट एण्ड बोल्ड आउट भए । अर्का ओपनर आसिफ शेख राज रोक्की नन्ननको बलमा ११ रनमा कट एण्ड बोल्ड भए ।
उपुल थरंगा २४ बलमा २ चौका र १ छक्कासहित २५ रनमा आउट भए । यसअघि लयमा देखिएका सिद्धान्त लोहनीलाई ९ र कुशल मल्ललाई एक रनमा म्याकार्थीले बोल्ड गरे । शरद भेषावकर ६ बलमा २ रन बनाउँदै नन्दन यादवको बलमा बोल्ड भए । प्रतिश जि।सी ८ बलमा २ चौकासहित १३ रनमा अविजित रहे ।
विराटनगरका आन्द्रे म्याकार्थीले ४ ओभरमा २३ रन खर्चेर ३ विकेट लिए । नन्दन यादव, राज रक्की र साहब आलमले एक एक विकेट लिए । पोखरा ५ खेलमा सबैमा पराजित हुँदै पुछारमा छ । पोखरा शीर्ष चारमा रहँदै प्लेअफ खेल्न बाँकी पाँच खेल नै जित्नुपर्छ । अन्य टोलीको नतिजामा पनि भरपर्नुपर्ने हुन्छ ।
लुम्बिनी ४ खेलमा ८ अंकका साथ शीर्ष स्थानमा छ । लुम्बिनी अपराजित एक्लो टोली हो । काठमाडौं नाइट्सले ३ खेलमा २ मा जित र १ मा हारसहित दोस्रो स्थानमा छ । विराटनगर सुपर किंग्स ४ खेलमा २ मा जित र २ मा हारसहित ४ अंकका साथ तेस्रो स्थानमा छ ।
जनकपुर रोयल्स ३ खेलमा २ मा जित र १ मा हारसहित ४ अंक भएपनि नेटरनरेटको कारण चौथो स्थानमा छ । फार वेस्ट युनाइटेड ३ खेलमा १ मा जित र २ मा हारसहित २ अंकका साथ पाँचौं स्थानमा छ । पोखरा अंक विहीन हुँदै पुछारमा छ । शीर्ष चार टोली प्लेअफमा पुग्नेछन् ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
