विद्यालय शिक्षा विधेयक पढ्दा विवाहमा दुलाहा नै भागेजस्तो अनुभूति भयोः सिके राउत

होमल्याण्ड खबर

२०८० आश्विन १९ गते, शुक्रबार १४:२३ मा प्रकाशित

जनमत पार्टीका अध्यक्ष सिके राउतले सरकारले ल्याएको विद्यालय शिक्षा विधेयक संघीयता विरोधी रहेको बताएका छन्। शुक्रबार प्रतिनिधिसभा बैठकमा विद्यालय शिक्षा विधेयकमाथिको सैद्धान्तिक छलफलमा भाग लिँदै अध्यक्ष राउतले विधेयकमा पर्याप्त छलफल नगरी संसदमा ल्याइएको भन्दै आपत्ती जनाए। उनले विधेयक पढ्दा विहेको तामझाम छ र दुलाहा नै भागीराखेको जस्तो अनुभूति भएको टिप्पणी गरे।

राउतले विधेयक जुन प्रयोजनका लागि ल्याइएको हो त्यसबारे छलफल नै नभएको जिकिर गरे। माध्यमिक शिक्षा बोर्डलाई केन्द्रमा नभइ प्रदेशमा राख्नुपर्ने उनको सुझाव छ। उनले भने,’जब लोकसेवा आयोग प्रदेशमा भइराखेको छ। निजामति सेवा पनि स्थानीय तहमा भइराखेको छ । माध्यमिक शिक्षा बोर्डलाई केन्द्रमा नभइ यसलाई प्रदेशमा राख्नुपर्छ।’

राउतले जिल्ला शिक्षा कार्यालय ब्यूताउनु भनेको संघले शिक्षामा नियन्त्रण गर्न खोजेको बताए। जिल्ला शिक्षा कार्यालय खारेज हुनुपर्ने उनको माग छ।

विद्यार्थीको आवाज विधेयकमा नसमेटिएको उनको भनाइ छ। उनले विद्यार्थीले कस्तो खालको शिक्षा पाउने,त्यसको गुणस्तर कस्तो हुने,त्यसमा पहुँच कस्तो हुने, सहजता छ कि छैन त्यो कुरा विधेयकले सम्बोधन गर्नुपर्ने बताए।

जनमत पार्टीले ल्याएको १० कक्षापछि एक वर्ष अनिवार्यरुपमा प्राविधिक शिक्षा दिनै पर्ने नीति विधेयकमा समावेश गर्न आग्रह समेत गरे। राउतले शिक्षकहरूलाई निजामति सेवाका कर्मचारीको भन्दा २५ प्रतिशत बढी सेवा सुविधा दिनुपर्ने आफूहरूको माग रहेको बताए।

शिक्षकहरूको पनि वार्षिकरुपमा मूल्यांकन हुनुपर्ने उनको सुझाव छ।

सम्बन्धित खबर

ऊर्जामन्त्री खड्का र विश्व खाद्य संगठनका प्रतिनिधिबीच भेटवार्ता

दुर्गा प्रसाईं भक्तपुरबाट पक्राउ

स्थानीय तह उपनिर्वाचन : उम्मेदवारको नामावली प्रकाशन आज

प्रधानमन्त्रीद्वारा पूर्वसभामुख ढुङ्गानाप्रति श्रद्धाञ्जलि अर्पण

मुख्यसचिव अर्यालले दिए राजीनामा

भ्रष्टाचारमा सफाइ पाएपछि योजना आयोगमा हाजिर भए वैकुण्ठ अर्याल