३० कार्तिक २०८१, शुक्रबार
२०७५ कार्तिक २९ गते, बिहीबार ११:४२ मा प्रकाशित
प्रदेश नम्बर २ का मुख्यमन्त्री लालबाबु राउतले संविधानले दिएको अधिकार ओली सरकारले रोक्न नसक्ने बताएका छन् ।
उनले प्रदेश सरकार संविधान विपरीत नजाने र संविधानभित्र रहेर सरुवा बढुवादेखि कर्मचारी नियुक्ति गर्ने बताए ।
उनले भने, ‘संघीय सरकारमा खुट्टा तानातान छ, तराई मधेसमा खुसीयाली छ हामी अगाडि बढ्छौं भन्ने जनतालाई विश्वास छ, त्यही विश्वासमा रहेर अब छठ सकियो धमाधम काम गर्छौं ।’
मुख्यमन्त्री राउतले सदन खोलेर करारमा कर्मचारी भर्ना गर्ने प्रक्रिया अगाडि बढ्ने बताए ।
संघीय सरकारले आफूहरुलाइृ काम नै गर्न नदिएको आरोप लगाउँदै उनले भने, ‘अब हामी संविधान अनुसार चल्छौं, केन्द्र सरकारले हामीलाई रोक्न सक्दैन ।
कर्मचारी चलाउनै नपाएपछि काम गर्न असजिलो भएको भन्दै प्रदेश २ ले प्रदेश प्रहरी ऐन जारी गरिसकेको छ ।
संघीय सरकारले कर्मचारीहरुको सरुवा, बढुवादेखि नियुक्ति आफैले गर्ने अड्डी कसेपछि प्रदेश २ तातेको हो ।
त्यसपछि हच्किएको संघीय सरकारले प्रदेश प्रहरी, प्रशासन तथा शान्ति सुरक्षा सम्बन्धी कार्यकारी आदेश मार्फत तल्लो तहका प्रहरीको सरुवा तथा प्रहरी चौकी अधिकार प्रत्यायोजन गरेको छ ।
प्रहरीतर्फ सहीसम्मको सरुवा गर्न पाउने अधिकार प्रदेश सरकारले पाएको छ । प्रदेश सरकारले भने सबै कर्मचारीको सरुवा बढुवाको अधिकार पाउनु पर्ने अड्डी कसेका छन् ।
संविधानमा ‘संघीय प्रहरी ऐनका आधारमा मात्र प्रदेश प्रहरी ऐन निर्माण हुने’ उल्लेख छ । मुख्यमन्त्री राउतले संघीय सरकारले अधिकार दिनै नखोज्नु बिडम्बना भएको बताए ।
उनले भने, ‘छठ सकियो अब भट्टाभट काम गर्छौं, संघीय सरकारका कारण हामीले हाम्रा जनतालाई धोका दिनु हुन्न ।’
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
