२ मंसिर २०८१, आईतवार
२०८० चैत्र २० गते, मंगलवार १५:०४ मा प्रकाशित
प्रधानमन्त्री पुष्पकमल दाहाल ‘प्रचण्ड’ले नागरिक उन्मुक्ति पार्टी (नाउपा)का अध्यक्ष रन्जिता श्रेष्ठ चौधरी र संरक्षक रेशम चौधरीसँग छुट्टाछुट्टै भेटवार्ता गरेका छन् । दुवैजनासँग प्रधानमन्त्रीले वर्तमान सरकारमा आउन आग्रह गरेका छन् ।
मंगलबार बिहान रन्जितासँग छलफल गरेका प्रधानमन्त्रीले दिउँसो रेशमसँग भेट गरेका हुन् । छलफल नयाँ सत्ता समीकरण र प्रदेश सरकारका विषयमा केन्द्रित रहेको बताइएको छ । रेशम र रन्जिताबीच मतैक्यता नहुँदा नाउपा वर्तमान सत्ता गठबन्धनमा आबद्ध छैन । नयाँ सत्ता समीकरण अनुसार सुदूरपश्चिम र लुम्बिनी प्रदेश सरकार गठनमा अन्यौल छ ।
नाउपाका संरक्षक चौधरीले प्रधानमन्त्री प्रचण्डले छलफलका लागि बोलाएपछि आफू गएको बताए । उनका अनुसार प्रधानमन्त्री प्रचण्डले सरकारमा आउन र नयाँ समीकरणअनुसारको सरकारलाई समर्थन गर्न आग्रह गरेका थिए ।
तर, आफूले आगामी २३ र २४ गते आफूले पार्टीको बैठक बोलाएको र बैठकले जे निर्णय गर्छ, त्यसैअनुसार निर्णय गर्ने बताएको जानकारी दिए । प्रदेश सरकारलाई स्वायत्त भएर निर्णय गर्न दिन पनि उनले प्रधानमन्त्रीलाई आग्रह गरेका बताए ।
रन्जिताले वर्तमान सत्ता गठबन्धनलाई समर्थन गरेपनि उनका पति रेशम विपक्षमा छन् । यही विवादको क्रममा सोमबार पार्टी केन्द्रीय कार्यालय अनामनगरमा रन्जिता र रेशम पक्षका नेताहरुबीच हात हालाहालसम्म भएको थियो ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
