दीपक मनाङेले भनेः फैसलाको पूर्ण पाठ आएपछि आफै अदालत उपस्थित हुन्छु

होमल्याण्ड खबर

२०८१ कार्तिक २३ गते, शुक्रबार १४:०९ मा प्रकाशित

गण्डकी प्रदेश सभा सदस्य राजीव गुरुङ (दीपक मनाङे) ले सर्वोच्चको फैसलाको पूर्ण पाठ आएपछि आफै अदालत उपस्थित हुने बताएका छन्। 

शुक्रबार प्रेस वक्तव्य जारी गर्दै मनाङले आफू सम्पर्कविहीन भएको भनेर सञ्चार माध्यममा आएका समाचारमा सत्यता नभएको बताएका हुन्। 

कात्तिक २० गते सर्वोच्च अदालतले मनाङेलाई ज्यान मार्ने उद्योगमा दोषी ठहर गरेको थियाे। न्यायाधीश डा. नहकुल सुवेदी र टेकप्रसाद ढुंगानाको इजलासले उच्च अदालत पाटनको फैसलालाई सदर गरेको हो। मनाङेको समूहले २०६१ सालमा गुण्डा नाइके चक्रे मिलनमाथि तरबार प्रहार गरी हात छिनाएको थियो। त्यही मुद्दामा उच्च अदालत पाटनले ५ वर्ष कैद तोकेको थियो। सर्वोच्चको फैसलापछि उनी सम्पर्कविहीन छन्। 

मनाङेले विगत केही दिनयता विभिन्न अखबार र सामाजिक सञ्जालमा मेरो विषयमा लेखिएका समाचार र टिकाटिप्पणी प्रति मेरो गम्भिर ध्यानाकर्षण भएको उल्लेख गरेका छन्। 

‘सम्मानित सर्वोच्च अदालतमा विचाराधीन मेरो मुद्दाको गत कार्तिक २० गते फैसला भएको विषय मैले मेरो तर्फबाट बहस पैरवी गरिरहेका कानून व्यवसायमार्फत थाहा पाएको हुँ। सो पश्चात मेरा कानुन व्यवसायीलाई फैसलाको नक्कल सार्न पठाए तर, अदालतबाट फैसलाको संक्षिप्त पाठ तयार नभएको भन्ने जानकारी आयो’, विज्ञप्तिमा उनले भनेका छन्।

उनले लेखेका छन्, ‘फैसला आँउदाको दिनदेखि केही गुणस्तरहित सञ्चार माध्यमहरुबाट तारन्तार आईरहेका कलहरूले गर्दा केही समयका लागि मैले प्रयोग गर्दै आएको मोबाइल बन्द गरेको छु । यही विषयलाई लिएर विभिन्न सञ्चार माध्यमहरूमा भ्रामक समाचारहरू सम्प्रेषण भइरहेको पाएको छ । यसमा मेरो आपत्ति छ।’

उनले सर्वोच्च अदालतबाट फैसलाको पूर्ण पाठ लिखित रुपमा प्राप्त भएपछि अदालतमा स्वयम् उपस्थित हुने दाबी गरेका छन्। 

गुण्डागर्दी पृष्ठभूमिका मनाङेले गत निर्वाचनमा मनाङ (ख) बाट गण्डकी प्रदेश सभामा सर्वसम्मत निर्वाचित भएका थिए । उनले २०७४ मा पनि मनाङ (ख) बाट निर्वाचित हुँदै संसदीय यात्रामा डेब्यु गरेका हुन्।

उनी गण्डकी प्रदेश सरकारमा छैटाैँ पटकसम्म मन्त्री भएर रेकर्ड बनाएका छन् ।पछिल्लो पटक भदौ १७ मा गण्डकी प्रदेश सरकारमा नेकपा एमाले सहभागी भएसँगै मनाङेले राजीनामा दिएका हुन्।

उनलाई भौतिक पूर्वाधार विकास तथा यातायात व्यवस्था मन्त्रालयबाट वन मन्त्रालयमा सारेपछि असन्तृष्ट बन्दै राजीनामा दिएका थिए।

सम्बन्धित खबर

आज पनि ह्वात्तै घट्यो सुनको मूल्य, कतिमा हुँदैछ कारोबार ?

आत्मसमीक्षासहित अब कहिल्यै नझुक्किने प्रण गरेको छु : बाबुराम भट्टराई

सांसद दीपक मनाङेलाई सीआईबी लगियो

राष्ट्रपति पौडेलले कोप–२९ शिखर सम्मेलनलाई आज सम्बोधन गर्दै

ओली सरकार आफ्नै कारणले ढल्छ : माओवादी

रवि लामिछानेलाई रुपन्देही ल्याउने तयारी