पोखराबाट दुबई उडानलाई नियमित बनाउन आह्वान

होमल्याण्ड खबर

२०८३ आश्विन १६ गते, शुक्रबार ११:२९ मा प्रकाशित

पोखरा महानगरपालिकाका मेयर धनराज आचार्यले पोखराबाट दुबई उडानलाई नियमित र सफल बनाउन सार्वजनिक आह्वान गर्नुभएको छ । उहाँले सरकारका तिनै तह, निजी क्षेत्र, पर्यटन व्यवसायी, नागरिक समाज तथा आमयात्रुले गम्भीरतापूर्वक लिनका लागि आग्रह गर्नुभएको छ । “अहिले पहल गर्न सकिएन भने पछि ‘त्यतिबेला गर्न सकेको भए हुन्थ्यो’ भनेर पश्चात्ताप गर्नुको अर्थ रहने छैन । यसका लागि पोखरा महानगरपालिकाले पनि योजनाबद्ध रूपमा काम गरिरहेको छ । प्रदेश तथा सङ्घीय सरकारले पनि आआफ्नो जिम्मेवारी अनुसार आवश्यक सहजीकरणको अपेक्षा छ,” उहाँले भन्नुभयो ।

भिसा तथा प्रहरी रिपोर्टलगायत आवश्यक प्रक्रियामा यात्रुलाई सहजता प्रदान गर्न सम्बन्धित निकायसँग समन्वय र सहजीकरण भइरहेको उहाँले बताउनुभएको छ । भारतीय नागरिकलाई आवश्यक पर्ने नो अब्जेक्सन लेटर पोखरा पेन्सन क्याम्प कार्यालयबाटै उपलब्ध गराउन सकिए यात्रामा थप सहजता हुने भएकाले सम्बन्धित दूतावाससँग आवश्यक अनुरोध गरिएको पनि उहाँले उल्लेख गर्नुभएको  छ ।  विभिन्न सङ्घ संस्था, व्यावसायिक समूह, कम्पनी तथा साथीको समूह बनाएर दुबई भ्रमण तथा अन्य अन्तर्राष्ट्रिय यात्राको योजना बनाउन पनि आह्वान गरिएको छ ।

पोखरामा रहेका करिब दुई दर्जन टुर्स एन्ड ट्राभल्सले टिकट, भिसा, प्रहरी रिपोर्ट तथा प्याकेजमा काम गरिरहेको पनि आचार्यको आह्वानमा उल्लेख छ । यात्रुले आफूलाई पायक पर्ने स्थानबाट यात्रा तयारी गर्न सक्ने व्यवस्था रहेको जनाइएको छ । एयरलाइन्सबाट प्राप्त जानकारी अनुसार काठमाडौँको तुलनामा पोखराबाट हवाई भाडा सस्तो रहेको आचार्यले उल्लेख गर्नुभएको छ । उहाँले यात्रा गर्नुअघि सम्बन्धित एयरलाइन्स वा ट्राभल एजेन्सीमार्फत भाडा तथा उडानको विवरण बुझ्न आग्रह गरेका छन् ।

पोखराबाट जाने यात्रुको बुकिङ बढाउन र यात्रुलाई आवश्यक जानकारी तथा सहजीकरण गर्न फ्लाई दुबईले पोखराको पुरानो विमानस्थलअगाडि कार्यालय स्थापना गरी पोखरा–दुबई डेस्क सञ्चालनमा ल्याएको आचार्यले बताउनुभयो । उहाँले सुरु भएको नियमित अन्तर्राष्ट्रिय उडानलाई सफल र दिगो बनाउन सबैले आआफ्नो ठाउँबाट योगदान गर्नुपर्ने बताउनुभएको छ । पोखरा अन्तर्राष्ट्रिय विमानस्थल नियमित अन्तर्राष्ट्रिय उडानका लागि स्थापित भएको भन्दै यसको सम्भावना तथा उपयोगिता प्रमाणित गर्न अहिलेको अवसर सदुपयोग गर्नुपर्ने उहाँको भनाइ छ । “पोखरा तपाईं हामी सबैको हो । यसको अन्तर्राष्ट्रिय भविष्य पनि हामी सबैको साझा जिम्मेवारी हो,” उहाँले भन्नुभएको छ ।

सम्बन्धित खबर

आज सुनचाँदीको मूल्य स्थिर

पूँजी बजार सुधारमा अर्थ समितिको कडाइ, तत्काल नयाँ धितोपत्र विधेयक ल्याउन निर्देशन

सेयर बजारमा दोहोरो अंकको गिरावट

सुनको मुल्य तोलामा पाँच हजार रुपयाँले घट्यो

आज कतिमा हुँदैछ सुनचाँदीको कारोबार ?

नेप्सेमा भारी गिरावट, ३६ अंकले घट्यो बजार