१४ कार्तिक २०८३, शुक्रबार
२०८३ कार्तिक १४ गते, शुक्रबार ११:२८ मा प्रकाशित
बंगालको खाडीमा विकसित ‘अर्नब’ चक्रवातको ‘अवशेष’को प्रभावले हाल देशका धेरै स्थानमा पानी परिरहेको छ । हिमाली भूभागमा हिमपात भइरहेको छ ।
आज र भोलि (कात्तिक १३–१४)सम्म देशका अधिकांश स्थानमा मेघगर्जन/चट्याङसहित मध्यमसम्मको वर्षा/हिमपातको सम्भावना रहेको मौसम पूर्वानुमान महाशाखाले जनाएको छ । “कोसी, मधेस, वाग्मती र गण्डकी प्रदेशको थोरै स्थानमा भारी वर्षा र एक–दुई स्थानमा धेरै भारी वर्षा/हिमपातको सम्भावना रहेको छ,” महाशाखाले भनेको छ ।
लुम्बिनी, कर्णाली र सुदूरपश्चिम प्रदेशका हिमाली र पहाडी भूभागका थोरै स्थानमा पनि भारी वर्षा/हिमपातको सम्भावना रहेको महाशाखाले जनाएको छ ।
“भोलि अपराह्नदेखि भने यसको प्रभाव क्रमिक रूपमा कम हुने देखिन्छ,” महाशाखाले भनेको छ ।
मौसमविद्लाई प्रश्न– काठमाडौंमा पनि भारी वर्षा हुन्छ ?
त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलले अबका ३० घण्टा सतर्क रहन आग्रह गरेका छन् ।
“आगामी ३० घण्टा विशेष सतर्क रहनुहोला, खासगरी नदी किनारमा बस्नुहुने र हिमाली क्षेत्रमा रहनुभएकाहरू,” उनले शुक्रबार बिहान सामाजिक सञ्जाल फेसबुकमा लेखेका छन् ।
उनको ‘अर्नब’को बाँकी न्यूनचापीय प्रणाली अझै नेपालबाट टाढै रहेको जनाएका छन् । “साँझतिर नेपालनजिक आइपुग्दा त्यसको प्रभावले करिब ५–१० घण्टासम्म भारी वर्षा हुन सक्ने देखिन्छ,” उनले भनेका छन् ।
त्रिविको जल तथा मौसम विज्ञान केन्द्रीय विभागकै अर्का सहप्राध्यापक डा. मदन सिग्देलले पनि आज बेलुकादेखि भोलि बिहानसम्म लुम्बिनी र गण्डकीका पूर्वी क्षेत्र तथा वाग्मती, मधेस र कोसी प्रदेशमा मध्यमदेखि भारी वर्षाको सम्भावना औँल्याएका छन् । शनिबार बेलुकादेखि वर्षा रोकिने उनको भनाइ छ ।
“हिजोदेखि अर्नब चक्रवातको प्रभाव लगभग सबै प्रदेशमा परेको छ, धेरै ठाउँमा हल्का पानी परेको छ,” उनले फेसबुकमा लेखेका छन्, “आज बेलुकादेखि भोलि बिहानसम्म लुम्बिनी र गण्डकी प्रदेशका पूर्वी क्षेत्र साथै वाग्मती, मधेस र कोसी प्रदेशमा मध्यमदेखि भारी वर्षाको सम्भावना देखिन्छ, भोलि बेलुकाबाट वर्षा रोकिने सम्भावना छ ।”
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
