लगानी सम्मेलनको तयारी अन्तिम चरणमा

होमल्याण्ड खबर

२०७५ फाल्गुन २३ गते, बिहीबार १२:५२ मा प्रकाशित

अहिले नेपाल लगानी सम्मेलन, २०१९ हुने–नहुने विषय चर्चामा छ । एकातिर पर्याप्त पूर्वतयारीबिना सम्मेलन आयोजना हुन लागेको टिप्पणी भइरहेको छ । तर, आयोजकले भने लगानी सम्मेलनको तयारी अन्तिम अवस्थामा पुगेको बताएको छ ।

लगानी बोर्डको कार्यालय, अर्थ मन्त्रालय, परराष्ट्र मन्त्रालय र उद्योग, वाणिज्य तथा आपुर्ति मन्त्रालयको संयुक्त आयोजनामा हुन लागेको सम्मेलनका लागि तीन साता बाँकी रहँदा सहभागीको ‘कन्फर्मेसन’ सूची बाहेक तयारीका अधिकांश काम पूरा भएको बताइएको छ ।
आयोजक उल्लेखित ४ निकायका कर्मचारी सम्मिलित सचिवालयका अनुसार सम्मेलनको मिति, स्थान, लोगो, नारा, एजेन्डा, ब्रोसर तयार भइसकेका छन् ।

यसअघि पहिचान भइसकेको लगानीका क्षेत्रका आधारमा सम्मेलनमा शोकेस हुने परियोजना छनोट पनि निर्णायक अवस्थामा पुगिसकेको छ । ती परियोजना सम्मेलनका क्रममा तत्काल डिल गर्न सकिने सम्भावित परियोजना हुन् ।

जसअनुसार प्रत्येक प्रदेशबाट २–२ वटा प्रादेशिक महत्वका परियोजना, निजी क्षेत्रले पहिचान गरेको परियोजना पनि रहेका छन् । सम्मेलनका क्रममा शोकेस हुने परियोजना वा लगानीको प्रतिबद्धता खोजिएका क्षेत्र ऊर्जा, सूचना तथा सञ्चार प्रविधि, पर्यटन, उद्योग, यातायात पूर्वाधार र कृषि रहेका छन् । सम्मेलनमा सहभागी लगानीकर्ताले यी क्षेत्रमा लगानी गर्ने अवसरबारे बुझ्न सक्नेछन् ।

लगानी सम्मेलन नेपालले गरेको नीतिगत सुधारका प्रगति लगानीकर्तासामू बुझाउन आयोजना हुन लागेको सम्मेलन हो । सम्मेलनका माध्यमबाट सरकारले सम्भावित आयोजनाको अध्ययन तथा विकासका लागि ढोका खुला गर्नेछ । यसका साथै नेपाल प्रवेश गर्न चाहने लगानीकर्ताको फिडब्याक सुन्ने र अझै आवश्यक नीतिगत सुधारको लागि सुझाव पनि मागिने छ ।
सम्मेलनका माध्यमबाट सरकारले व्यवसायीबीच सञ्चालनको प्लेटफर्म उपलब्ध गराउनेछ भने सार्वजनिक–निजी साझेदारी प्रवर्द्धन गर्नेछ । चैत १५ र १६ गते राजधानीको होटल सोल्टी क्राउन प्लाजामा आयोजना हुन लागेको सम्मेलनको व्यवस्थापन जिम्मा इमाजिङ नेपाललाई दिइएको छ ।

के छ प्रगति ?

सम्मेलन आयोजक सचिवालयका अनुसार सम्मेलनको अन्य तयारीसँगै नीतिगत सुधारको काम पनि अघि बढेको छ । विदेशी लगानीकर्ता आकर्षित गर्ने केही कानुन आइसकेका छन् भने केही कानून सम्मेलन अगावै संसदले अनुमोदन गर्ने क्रममा छन् । यसैगरी, विकास साझेदार तथा कुटनितिक नियकायसँग नियमित भेटघाट जारी छ । ती सबैलाई सम्मेलनबारे ब्रिफिङ दिइसकिएको छ ।

सम्मेलनका लागि आवश्यक प्रवर्द्धनात्मक भिडियो तयार हुँदै छ । यसका बाबजुद विदेशस्थित नियोग सचिवालय पनि सम्मेलनको प्रचार र प्रवर्द्धनमा लागेका छन् । उनीहरुले आफ्नो स्रोतको सक्रिय परिचालन गरि नेपालमा लगानी सम्मेलन हुँदैछ भन्ने चेतनाका लागि आफ्नो वेबसाइटको गृहपृष्ठमा लगानी सम्मेलनको फ्लायर राखेका छन् ।

यससँगै सम्भावित लगानीकर्ताको सूची पठाउने र उनीहरुलाई सम्मेलनमा सहभागिता हुन उत्प्रेरण सिर्जना गर्न विदेशस्थित कुटनीतिक नियोग सक्रिय रुपमा लागेका छन् । यसबाहेक देशबाहिर प्रचारका लागि स्वयम् अर्थमन्त्री, परराष्ट्रमन्त्री विदेश भ्रमणमा निस्किइ सम्भावित लगानीकर्तालाई लगानी सम्मेलनमा सामेल हन आह्वान गरिरहेका छन् ।

सम्मेलन कुनै अवस्थामा धकेलिँदैन : सचिवालय

लगानी सम्मेलनका लागि नेपाल लगानी बोर्डको सहसचिव संयोजकत्वमा काम भइरहेको छ । लगानी सम्मेलनका लागि खटिएका ४ वटै निकायका कर्मचारी दैनिक १२ घण्टा काममा लागेका छन् । आफूहरु बिदामा पनि काममा खटिएको स्वयम् कर्मचारी बताउँछन् ।
सम्मेलन आयोजक सचिवालयका सदस्य सचिव विशाल सापकोटा पनि सम्मेलनका लागि आवश्यक अधिकांश काम भइसकेका कारण लगानी सम्मेलन कुनै अवस्थामा नधकेलिने बताउँछन् ।

उनले भने, “सहभागिता टुंगो लाग्ने क्रममा छ । करिब २ सय इच्छुक लगानीकर्ताले आउने कन्फर्मेसन पठाइसकेका छन् । अब कुनै हालतमा पछि हट्ने अवस्था छैन ।”  यससँगै आफूहरु गत सोमबार पनि बिदाको दिन नभनी निमन्त्रणा पत्र पठाउन खटिएको उनले दाबी गरे ।

सापकोटाका अनुसार व्यवस्थापक कम्पनीसँग पनि दैनिकजसो प्रगति विवरण माग्ने गरिएको छ भने हप्ताको २ दिन नियमित छलफल हुने गरेको छ । यसका बाबजुद सम्मेलनका लागि सम्भावित लगानीकर्ताको सूची प्राप्त भइसकेको छ । तीमध्येबाट ६ सयभन्दा बढी निमन्त्रण पठाइएको छ । निमन्त्रण पठाइँदा पहिले विदेशी सम्भावित लगानीकर्तालाई चुनिएको सचिवलयले जनाएको छ । त्यसपछि गैरआवासीय नेपाली र तेस्रो प्राथमिकता आन्तरिक लगानीकर्तालाई दिइएको छ ।

सापकोटाका अनुसार लक्ष्यअनुरुप अर्थात् करिब ४ सय वटा सहभागिता हुने निश्चित भइसकेको छ । “त्यसका आधारमा करिब ३ दर्जन मुलुक सहभागी हुने पक्का देखिन्छ,” सापकोटाको दाबी छ । उनले सम्मलेनको सेडुअल र हरेक सत्रको मुख्यवक्ताको पनि टुंगो लागिसकेको जानकारी दिए ।

सम्बन्धित खबर

उद्योगहरूको बिजुली नकाट्ने प्राधिकरण बोर्डको निर्णय

कीर्तिपुरमा जित सुनिश्चित बनाउँदै माओवादी

हिजो सम्भवः नभए पछि रबि लामिछानेलाई आज साँझसम्म काठमाडौं ल्याइने

दुर्गा प्रसाईँलाई सर्वोच्चमा उपस्थित गराइयो

चुडामणिको मुद्दामा विपक्षी झिकाउन सर्वोच्चको आदेश

सर्वोच्चको बोर्डमा कालो रङ छ्यापेकी बिनु यादव प्रहरी नियन्त्रणमा