धितोपत्र बोर्डका अध्यक्ष र नेप्सेका सीईओलाई निलम्बन गर्न सांसदहरूको माग

होमल्याण्ड खबर

२०७८ भाद्र ४ गते, शुक्रबार १४:४८ मा प्रकाशित

 प्रतिनिधिसभा अन्तरगतको संसदीय समितिमा नेपाल स्टक एक्सचेन्ज (नेप्से)का प्रमुख कार्यकारी अधिकृत (सिईओ) र नेपाल धितोपत्र बोर्ड (सेबोन)का अध्यक्षलाई निलम्बन गर्न माग उठेको छ ।

शेयरमा इन्साइडर ट्रेडिङमा नियामक निकायकै संलग्नता रहेको भन्दै समितिमा आबद्ध सांसदहरुले सेबोनका अध्यक्ष भीष्म ढुंगाना र नेप्सेका सिईओ चन्द्रसिंह साउदमाथि छानबिन हुनुपर्ने माग उठाएका हुन् । शुक्रबार अर्थसमितिमा भएको छलफलमा अर्थमन्त्री जनार्दन शर्मासँग उनीहरुले छानबिन गरी दोषीलाई कारबाही गर्न माग गरेका हुन् ।

सांसद रामकुमारी झाँक्रीले सेबोनका अध्यक्ष ढुंगानामाथि सेबोनकै कर्माचारीहरुले प्रश्न उठाएको भन्दै यसलाई सामान्य रुपमा लिन नहुने र छानबिन हुनुपर्ने कुरा उठाइन् । उनले शेयरको गैरकानुनी किनबेचमा संलग्न जोकोहीलाई तत्कालै निलम्बन गरी छानबिन गर्न माग गरिन् ।

यसैगरी पूर्वअर्थमन्त्री समेत रहेका सुरेन्द्र पाण्डेले शेयरमा भएको इन्साइडर ट्रेडिङबारे उच्चस्तरीय समिति बनाएर नै छानबिन हुनुपर्ने बताए । यस्तै सांसद रामबहादुर यादवले आफ्ना मान्छेको नाउँमा शेयर किन्न लगाउनेहरुमाथि छानबिन हुनुपर्ने बताए ।

बुक बिल्डिङ विधिबाट महंगोमा शेयर निष्काशनको तयारीमा रहेको सर्वोत्तम सिमेन्टको सेयर पहिले नै भित्री रुपमा पहुँचवालाहरुले उठाएको देखिएको छ । सेबोन अध्यक्ष ढुंगानाको छोरी तथा नेप्सेका सिईओ साउँदकी श्रीमती लगायत आफन्तको नाममा सेयर किनिएको भेटिएको छ ।

सम्बन्धित खबर

सेयर बजार आज २२ अंकले बढ्यो

६२ अंकले बढ्याे नेप्से परिसूचक

१.८८ अंकले घट्याे सेयर बजार

ग्लोबल आइएमई बैंकका ग्राहकलाई दुषित थानी हिमालयन रिसोर्टमा १५ प्रतिशत छुट

नेप्से १८ अंकले घट्यो

आज २० अंकले घट्यो नेप्से