देशभरिकै सबैभन्दा बढी तापक्रम नेपालगन्जमा, जनजीवन प्रभावित

होमल्याण्ड खबर

२०८१ जेष्ठ २० गते, आईतवार ११:०१ मा प्रकाशित

 बिहीबार दिउँसोसम्म ४३ डिग्री सेल्सियस कायम भएको नेपालगन्जको तापक्रम बेलुका भने ४४ डिग्री सेल्सियसभन्दा माथि पुगेको छ। यो देशभरिमै सबैभन्दा बढी तापक्रम हो।

पछिल्ला केही दिनयता नेपालगन्जको तापक्रम दैनिक उकालो लागिरहेको छ। बिहीबार साँझ ४४.२ डिग्री सेल्सियस तापक्रम मापन गरिएको जल तथा मौसम विज्ञान महाशाखाले जानकारी दिएको छ। बुधबार ४२.८ डिग्री सेल्सियस तापक्रम मापन गरिएको थियो। बिहीबार नेपालगन्जसहित पश्चिम नेपालका चार सहरमा ४० डिग्री सेल्सियसभन्दा माथि तापक्रम मापन गरिएको छ।

नेपालगन्ज र धनगढीमा ४४ डिग्रीभन्दा माथि तापक्रम मापन गरिएको जल तथा मौसम विज्ञान महाशाखाले जनाएको छ। धनगढीको अधिकतम तापक्रम ४४.१ भने न्यूनतम ३०.२ डिग्री सेल्सियस छ। वीरेन्द्रनगरको ४१ र घोराहीको ४०.२ डिग्री सेल्सियस तापक्रम मापन गरिएको छ। भैरहवाको भने ३९.४ डिग्री सेल्सियस तापक्रम पुगेको थियो।

नेपालमा स्थानीय र पश्चिमी वायुको प्रभावसँगै बंगलादेश आसपास रहेको न्यून चापीय प्रणालीको आंशिक प्रभाव हुँदा पश्चिम तराईका जिल्लामा बुधबार यस वर्षकै सबैभन्दा बढी गर्मी महसुस भएको छ। ‘रेमल’ चक्रवातको प्रभाव कम हुँदै गएको र पानी पर्ने क्रम कम हुँदै गएका कारण पनि अत्यधिक गर्मी भएको जिल्ला विपद् व्यवस्थापन समितिका सूचना व्यवस्थापन अधिकृत रुपन ज्ञवालीले जनाए।

गर्मी बढेसँगै नेपालगन्जलगायत पश्चिम क्षेत्रको जनजीवन प्रभावित भएको छ। शुक्रबार कोशी, मधेश, बागमती र गण्डकीलगायत पहाडी भू–भागमा आंशिकदेखि साधरणतया बदली रही बाँकी भू–भागमा आंशिक बदलीदेखि मौसम मुख्यतया सफा रहने मौसम पूर्वानुमान महाशाखाले मौसम पूर्वानुमान बुलेटिनमार्फत जानकारी दिएको छ।

कोशी, बागमती र गण्डकी प्रदेशको थोरै स्थानहरू तथा मधेश प्रदेश र लुम्बिनी प्रदेशका पहाडी भू–भागका एक–दुई स्थानमा मेघ गर्जन/चट्याङसहित हल्का वर्षाको सम्भावना रहेको महाशाखाले जनाएको छ।

कोशी, बागमती र गण्डकी प्रदेशका उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको छ। शुक्रबार राति भने कोशी, मधेश, बागमती र गण्डकी प्रदेशमा आंशिकदेखि साधरणतया बदली रही बाँकी भू–भागमा आंशिक बदलीदेखि मौसम मुख्यतया सफा रहने छ।

कोशी, मधेश, बागमती र गण्डकी प्रदेशका थोरै स्थानहरूमा तथा लुम्बिनी प्रदेशका पहाडी भू–भागका एक–दुई स्थानमा मेघ गर्जन/चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ।

सम्बन्धित खबर

उद्योगहरूको बिजुली नकाट्ने प्राधिकरण बोर्डको निर्णय

कीर्तिपुरमा जित सुनिश्चित बनाउँदै माओवादी

हिजो सम्भवः नभए पछि रबि लामिछानेलाई आज साँझसम्म काठमाडौं ल्याइने

दुर्गा प्रसाईँलाई सर्वोच्चमा उपस्थित गराइयो

चुडामणिको मुद्दामा विपक्षी झिकाउन सर्वोच्चको आदेश

सर्वोच्चको बोर्डमा कालो रङ छ्यापेकी बिनु यादव प्रहरी नियन्त्रणमा