गोरखाका काम नगर्ने ठेकेदारको नाम गृहमा पठाइयो

होमल्याण्ड खबर

२०७५ जेष्ठ १४ गते, सोमबार १०:०३ मा प्रकाशित

जिल्ला प्रशासन कार्यालयले जिल्लाभित्र विकास निर्माणको कामको जिम्मा लिएर पूरा नगर्ने निर्माण कम्पनी तथा व्यवसायीको नाम गृह मन्त्रालयमा पठाएको छ ।
केही दिन अघि गृहमन्त्री रामबहादुर थापाले ७७ वटै जिल्लाका प्रमुख जिल्ला अधिकारीलाई पत्राचार गरी काम नगर्ने ठेकेदारको विवरण पठाउन निर्देशन दिएपछि जिल्ला प्रशासनले पनि विवरण पठाउन थालेको हो ।
‘निर्माणको काम नगर्ने, गरे पनि सुरु मात्रै गरेर म्याद थप गर्न आग्रह गर्ने काम गर्न आलटाल गर्ने कम्पनी र व्यवसायीको विवरण गृहमन्त्रालयमा पठाउन थालिएको छ’ प्रमुख जिल्ला अधिकारी नारायणप्रसाद भट्टराईले भने, ‘जिल्ला प्रशासनले सम्बन्धित विषयगत कार्यालयबाट काम जिम्मा लिने तर काम नगर्नेहरू पहिचान गरी गृहमा विवरण पठाएको हो।’ विकास निर्माणको कामलाई आलटाल गर्ने ठेकेदारमाथि कारबाहीको प्रक्रिया सुरु भएको प्रजिअ भट्टराईले जानकारी दिए । गृहमा सिफारिस भएका ठेकेदारहरू ११ किलो छेपेटार भालुस्वाँरा बारपाक सडक आयोजना, शहरी विकास तथा भवन डिभिजन कार्यालय र जिल्ला आयोजना कार्यान्वयन इकाइबाट सडक, पुल, विद्यालय भवन, सरकारी भवनहरू जिम्मा लिएर समयमै काम पुरा नगर्नेहरू छन् । गोरखा प्रशासनले काम नगर्ने १०५ ठेकेदारको नामावली समेत तयार पारेको छ । त्यस्तै जिल्ला प्रशासनले कारबाहीको दायरामा ल्याउनु अघि सम्बन्धित व्यावसायिक फर्मका प्रतिनिधिहरूलाई प्रशासनको सम्पर्कमा आउन समेत अनुरोध गरेको छ ।
प्रशासनले आयोजनाको म्याद सकिएको र काम छाडेर भाग्ने ठेकेदारलाई कालोसूचीमा राख्न प्रक्रिया अघि बढाई कारबाही गरिने जनाएको छ । प्रजिअ भट्टराईले प्रशासनको उद्देश्य कारबाही मात्रै नभई काम गर्ने सहयोग गर्ने समेत रहेको बताए । ठेकेदारले गोरखासँगै अन्य जिल्लामा निर्माणको जिम्मा लिए नलिएको अध्ययन गरी अन्य जिल्लामा उक्त काम रोक्का गर्न गृहमन्त्रालयमा सिफारिस गर्ने तयारीमा प्रशासन छ ।
विकास निर्माणको जिम्मा लिने अहिले अनेक बाहना बनाएर पन्छिनेलाई कारबाही गरेरै छोड्छौं ।’ निश्चित समयमा सम्पन्न गर्ने भनेर जिम्मा लिएकाहरूलाई अब म्याद थप समेत नहुने प्रजिअ भट्टराईले जानकारी दिए । ‘अब आयोजनाको म्याद थप हुँदैन’ उनले भने ‘ठेक्का लगाउने बेलामा सबै तोकेकै समयमा सम्पन्न गर्नेछु भनेर लगाउने अहिले कहिले बालुवा भएन,कहिले ढुंगा भएन भनेर बाहना बनाएर उम्कन पाइँदैन ।’ प्रजिअले सबै विषयगत कार्यालयका प्रमुखलाई ठेकेदारलाई म्याद थप नगर्न निर्देशन समेत दिएसकेका छन् ।

सम्बन्धित खबर

कमजोरी सच्याउन एमाले तयार छ : शङ्कर पोखरेल

चीनसँग ऋण लिन सकिँदैन : कांग्रेस

कोटेश्वर क्षेत्रमा दुर्गा प्रसाईं समूहको प्रदर्शन

विरजंगबाट पोखरा आउँदै गरेकाे बस हेटाैंडामा दुर्घटना

भद्रकालीबाट सुुरु भयो एमालेको र्‍याली

सुनको मुल्य प्रतितोलामा एक लाख ६५ हजार ५०० पुग्यो