हुम्लाको हिल्सामा एकसातादेखि हिमपात

होमल्याण्ड खबर

२०७८ कार्तिक ८ गते, सोमबार १२:११ मा प्रकाशित

मौसममा खराबीसँगै हुम्लाको हिल्सा क्षेत्रमा सातायता भारी हिमपात भइरहेको छ । हिमपातका कारण नेपाल–चीन सीमानाका पूर्ण रूपमा बन्द भएको छ भने सडक तथा सञ्चार सम्पर्क पनि टुटेको छ ।

हिल्सास्थित सशस्त्र प्रहरीको बोर्डर आउट पोस्ट (बीओपी) सँग पनि सञ्चार सम्बन्ध टुटेको जिल्ला प्रहरी प्रमुख डीएसपी हेरम्भ शर्माले बताए । दैनिकजसो हिमपात भइरहेकाले सोलार चार्ज नहुँदा प्रहरी सेटले काम नगरेको उनले बताए ।

गत सोमबार नै हिल्सामा झन्डै ३ फिटसम्म हिउँ परेको उनले जनाए । गत बिहीबार हिमपातका कारण लिमीमा अलपत्र परेका स्लोभिनियाका ४ नागरिकसहित ३ स्थानीयलाई हेलिकोप्टरबाट उद्धार गरिएको थियो ।

हिल्सामा नेपाल टेलिकमको टावर नबनेको कारण पनि सञ्चार सम्पर्क विच्छेद भएको हो । उक्त क्षेत्रमा वर्ल्डलिंक कम्युनिकेसनले इन्टरनेट जडान गरे पनि हिमपातयता सञ्चालनमा छैन । झन्डै ४ हजार मिटरमाथिको उचाइमा रहेको हिल्सामा अहिले सशस्त्र प्रहरीको बीओपीसहित नेपाल प्रहरीको सीमा चौकी पनि छ, हिल्सा नजिकैको करिब ५ हजार मिटर उचाइमा रहेको नाराताल क्षेत्रमा पनि बाक्लो हिउँ जमेपछि सदरमुकाम सिमकोट र नाम्खा गाउँपालिकाको केन्द्र पुग्ने सबै बाटा पुरिएका छन् ।

एक साताअघि चीनले सहयोग गरेको खाद्यान्न र औषधि बुझ्न सदरमुकामबाट हिल्सा गएको सहायक प्रमुख जिल्ला अधिकारी दशरथ राई सहितको टोली पैदलमार्गबाट सिमकोट फर्किरहेको छ । नाम्खा गाउँपालिका–६ लिमीमा पनि भारी हिमपात भएको छ ।

सम्बन्धित खबर

सबैलाई समेटेर लैजान्छौँ : सभापति गगन थापा

बुटवलमा भूमिहीनको प्रदर्शन

स्वास्थ्य शिक्षा सामग्री अब हुलाकमार्फत देशभर पठाइने

४० लाख मूल्य बराबरको अवैध समानसहित दुई पक्राउ

कोहलपुरमा अतिक्रमण गरिएका सात सय घरटहरा हटाइए

मत्स्यनारायणमा भक्तजनको घुइँचो