फर्जी भन्नु गलत हो, इन्काउन्टरमै मारिएका हुनः गृहमन्त्री बादल

होमल्याण्ड खबर

२०७५ श्रावण २५ गते, शुक्रबार १२:३६ मा प्रकाशित

गृहमन्त्री रामबहादुर थापा बादलले अपहरणकारीलाई २४ घन्टामा निस्तोज पार्न सरकार सफल भएको जनाएका छन् । उनले फेक इन्काउन्टर हल्ला मात्र भएको समेत बताए ।

भरतपुर विमानस्थलमा सञ्चारकर्मीहरुसँग कुरा गर्दै गृहमन्त्री बादलले ११ वर्षीय बालक निशान खड्का अपहरणकारीहरु इन्काउन्टरमै मारिएको दाबी गरेका छन् ।

फेक इन्काउन्टर भएको चर्चा छ नि भन्ने प्रश्नमा उनले भने, ‘सरकारले आफ्नो पोजिसन प्रस्ट पारेको छ । यो विषयलाई हल्लाकै रुपमा बुझेका छन् ।’ गृहमन्त्री थापाले अपहरणकारीहरु प्रहरीको गोलीबाट मारिएकोमा सन्तोष प्रकट गर्दै भने, ‘२४ घण्टाभित्र नै अपहरणकारी र हत्यारालाई निस्तेज पार्न सरकार सफल भएको छ, मूल कुरा त्यो हो । ’
छानविनपछि ‘मूल कुरा’
गृहमन्त्री थापाले विहीबार सिंहदरबारमा बसेको प्रतिनिधिसभा राज्य व्यवस्था तथा सुशासन समितिको बैठकमा इन्काउन्टरबारे गृहमन्त्रालयले छानविन गर्ने बताएका थिए । तर, त्यसबारे छानविन नगर्दै शुक्रबार गृहजिल्ला चितवन पुगेका मन्त्री बादलले त्यो ‘फेक इन्काउन्टर’ नभएको ठोकुवा गरेका हुन् ।
भक्तपुरमा बालक निशान खड्काको अपहरणपछि हत्या हुँदा र त्यसपछि प्रहरीले अपहरणकारीमाथि गोली चलाउँदा गृहमन्त्री थापा नेपालमा थिएनन् । त्यसबेला मन्त्री थापा इण्डोनेसियाको बालीमा आयोजित एक कार्यक्रममा भाग लिन गएका थिए ।
गृहमन्त्री थापा आफैंले अपराधीहरुलाई निस्तेज पारिनु ‘मूल कुरा’ भएको बताइसकेपछि अब विहीबार उनैले संसदीय समितिलाई दिएको छानविनको आश्वासन भने कार्यान्वयनमा नजाने संकेत देखिएको छ ।
गृहमन्त्री नेपाल फर्केर आइसक्दा नसक्दै प्रहरीले गरेको ‘इन्काउन्टर’ विवादमा परेको थियो । मारिएका अपहरणकारीका परिवारले मानवअधिकार आयोगमा समेत पुगेर यस विषयमा छानविन गर्न माग गरेका थिए ।

स्रोतका अनुसार प्रहरी प्रधान कार्यालय पनि यसबारे छानविन समिति गठन गर्नेमा नकारात्मक थिएन । र, सोही अनुसार गृहमन्त्री थापालाई सुरुमा इन्काउन्टरबारे छानविन समिति गठन गरिनुपर्ने भएको थियो । र, प्रहरी हेडक्वार्टरको सोही लाइनमा टेकेर मन्त्री थापाले विहीबार संसदीय समितिको बैठकमा इन्काउन्टरबारे छानविन हुने वचन दिए ।
यसैवीच विहीबार नै महानगरीय अपराध अनुसन्धान महाशाखाका एसएसपी धिरजप्रतापसिंह ले गृहमन्त्री थापासँग भेट गरे । सिंह नेतृत्वको टोलीले गृहमन्त्रीलाई ब्रिफिङ गर्दै भन्यो कि त्यो घटना फेक एन्काउन्टर होइन, साँच्चैको इन्काउन्टर नै हो ।
सम्भवतः मन्त्री थापा महाशाखाको भनाइमा कन्भिन्स भएकैले शुक्रबार उनले भरतपुर विमानस्थलपुगेपछि अपराधीहरुलाई ठाउँको ठाउँ मारिनु फेक इन्काउन्टर नभएको स्पष्टीकरण दिएका हुन् ।

गृहमन्त्री थापा आफैंले यो फेक इन्काउन्टर नभएको र अपराधीहरुलाई निस्तेज पारिनु ‘मूल कुरा’ भएको बताइसकेपछि अब विहीबार उनैले संसदीय समितिलाई दिएको छानविन समिति गठनको आश्वासन भने कार्यान्वयनमा नजाने संकेत देखिएको छ ।

सम्बन्धित खबर

दुर्गा प्रसाईँलाई सर्वोच्चमा उपस्थित गराइयो

चुडामणिको मुद्दामा विपक्षी झिकाउन सर्वोच्चको आदेश

सर्वोच्चको बोर्डमा कालो रङ छ्यापेकी बिनु यादव प्रहरी नियन्त्रणमा

२ हजार ६ सय रुपैयाँले घट्यो सुनको मूल्य

रबि लामिछानेलाई आज काठमाडौं ल्याईदै

चीन भ्रमणमा ऋणसम्बन्धी कुनै सम्झौता गर्दैनौँ : प्रधानमन्त्री