भोलिदेखि लागू हुँदैछ जोरबिजोर प्रणाली: कुन दिन कुन सवारी चल्ने

होमल्याण्ड खबर

२०७५ भाद्र १२ गते, मंगलवार १२:१७ मा प्रकाशित

आगामी १४ र १५ गते हुने बिमस्टेक बैठकलाई ध्यानमा राखेर बुधबारदेखि शुक्रबारसम्म काठमाडौँ उपत्यकाका निजी र सार्वजनिक सवारीमा जोर–बिजोर प्रणाली लागु हुँदैछ ।
बैठकमा नेपालसहित बंगलादेश, भुटान, भारत, म्यानमार, श्रीलंका र थाइल्याण्डका राष्ट्र प्रमुखहरुले भाग लिनेछन् ।
सम्मेलनका दौरान भीआइपीहरुको सवारी हुँदा ट्राफिक आवागमनमा असहज हुने भन्दै जोरबिजोर प्रणाली लागु गरिएको हो ।
आइपीको सवारी हुँदा कम्तिमा आधा घण्टा सडक प्रभावित हुनेछ ।
हाल काठमाडौँ उपत्यकाको सडकमा १ मिनेटमा औसतमा १३० वटा गाडी चल्ने गर्दछ । कोटेश्वर क्षेत्रमा त यो औसत २ सय रहेको छ । यसरी आधा घण्टासम्म सवारी आवगमन प्रभावित हुँदा अत्याधिक जाम हुने भएपछि जोरबिजोर प्रणाली लागू गर्नु परेको महाशाखाले जनाएको छ ।
यसअघि, सार्क सम्मेलन र भारतीय प्रधानमन्त्रीको नेपाल भ्रमणका क्रममा सार्वजनिक बिदा दिइए पनि यसपटक भने नेपाल सरकारले बिदा दिएको छैन । यसअघि बिदा दिँदा ब्यापकरुपमा विरोध भएपछि सरकारले बिदा नदिएको हो ।
महानगरीय ट्राफिक प्रहरी महाशाखाका अनुसार १३ र १५ गते बिजोर नम्बर प्लेट भएका सवारी साधनहरु चल्न पाउनेछन् भने १४ गते जोर नम्बर प्लेट भएका सवारीहरु चल्न पाउनेछन् ।
यो नियम सरकारी सवारीमा भने लागू नहुने बताइएको छ । त्यस्तै, विशेष सुरक्षा पास लिएका सवारीहरुमा पनि यो लागू हुने छैन ।
महाशाखाका अनुसार १३ गते बुधबार र १५ गते शुक्रबार नम्बर प्लेटमा अन्तिम अक्षर विजोर १, ३, ५, ७ र ९ भएका निजी र सर्वाजनिक सवारी चल्न पाउनेछन् ।
१४ गते बिहिबार जोडी अक्षर भएका सवारी मात्र चल्न पाउनेछन् । जसमा नम्बर प्लेटको अन्तिम अक्षर ०, २, ४, ६ र ८ रहेका सवारी छन् ।
काठमाडौँ उपत्यकामा हाल करीब ११ लाख सवारी दर्ता रहेकोमा औसत ९ लाख सवारी सडकमा दौडन्छन् । जोरबिजोर प्रणाली लागू हुँदा ४ देखि ५ लाख गाडी हट्ने विश्वास महाशाखाले लिएको छ ।

सम्बन्धित खबर

दुर्गा प्रसाईँलाई सर्वोच्चमा उपस्थित गराइयो

चुडामणिको मुद्दामा विपक्षी झिकाउन सर्वोच्चको आदेश

सर्वोच्चको बोर्डमा कालो रङ छ्यापेकी बिनु यादव प्रहरी नियन्त्रणमा

२ हजार ६ सय रुपैयाँले घट्यो सुनको मूल्य

सामाजिक सुरक्षा एउटा उन्नत अवधारणा र अभ्यास : प्रधानमन्त्री

रबि लामिछानेलाई आज काठमाडौं ल्याईदै