१० मंसिर २०८१, सोमबार
२०७५ आश्विन ११ गते, बिहीबार १४:०६ मा प्रकाशित
दसैको मुखमा आएर दैनिक उपभोग्य वस्तु खाद्यान्नको मूल्य वृद्धि भएको छ । सार्वजनिक यातायातको भाडा बढेसँगै तेल, मैदा, आँटा, चिनी, चामललगायतका खाद्यवस्तुको मूल्य प्रतिकेजीमा ५ देखि १५ रूपैयाँसम्म बढेको हो । चाडपर्वको मुख खाद्यान्नको मुल्य बढ्दा त्यसको प्रत्यक्ष प्रभाव उपभोक्तालाई परेको छ । इन्धनको मूल्य वृद्धिसँगै सार्वजनिक यातायातको भाडा बढेकाले खाद्यान्नको मुल्य पनि बढेको व्यवसायीले, बताएका छन् ।
नेपाल खुद्रा व्यापार संघका अध्यक्ष पवित्रमान बज्राचार्यले तेल, मैदा, आँटा, चिनी, चामललगायतका खाद्य वस्तुको मुल्य बढेको बताए । ठूला होलसेल व्यापारीले मुल्य बढाएकाले पनि मुल्य बढाउनुपरेको उनको भनाइ छ । “डलरको मुल्य बढेकाले आयातित तोरीको तेलको मुल्य प्रतिलिटरमा १० देखि १५ रूपैयाँ बढेको छ,” उनले भने, “खरिद मूल्य बढेर आएकाले स्थानीय बजारमा समेत त्यसको प्रत्यक्ष असर पर्छ ।”
संघका अनुसार आटा, मैदा र तेल प्रतिलिटरमा १० देखि १५ रूपैयाँसम्म मूल्य बढेको छ । यस्तै चिनी प्रतिकेजीमा पाँच रूपैयाँ बढेको छ ।
सरकारले चिनी आयातमा प्रतिबन्ध लगाएपछि बजारमा मुल्य बढ्न गएको हो । स्वदेशी उत्पादनको तुलनामा बाहिरबाट आयात हुने चिनी सस्तो पर्ने गर्छ । स्वदेशी उत्पादनको लागत महंगो पर्न गएकाले पनि बजार मुल्य बढ्न गएको देखिन्छ । व्यवसायीका अनुसार ४५ रूपैयाँ प्रतिकिलो बिक्री हुँदै आएको मैदा बढेर प्रतिकिलो ५५ रूपैयाँ पुगेको छ । यस्तै आँटा १० रूपैयाँ बढेर प्रतिकिलो ५० रूपैयाँ पुगेको छ । तेलमा पनि व्यापारीले मुल्यवृद्धि गरेका छन् । भटमासको तेल, सूर्यमुखी तेल, तोरीको तेलमा प्रतिलिटर १५ रूपैयाँ बढेको छ । अहिले भटमासको तेल प्रतिलिटर १ सय ४०, सूर्यमुखी १ सय ५०, तोरीको तेल १ सय ६०, वनस्पती घ्यू १ सय ४० रूपैयाँ पुगेको संघले जानकारी दिएको छ ।
अमेरिकी डलरको भाउ अकासिएपछि आयातित सामानको मुल्य बढेको हो । सरकारले स्वदेशी उत्पादनलाई प्रवद्र्धन गर्न भन्दै चिनीको आयातमा कोटा तोकेपछि व्यापारीले मुल्य वृद्धि गरेका छन् । अहिले चिनीको खुद्रा बिक्री मुल्य प्रतिकिलो ७५ देखि ८० रूपैयाँ पुगेको छ । यसअघि स्वदेशी चिनीको मुल्य ७५ रूपैयाँसम्म थियो । बजारमा आयातित चिनी ६५ देखि ६८ रूपैयाँसम्ममा पाइन्थ्यो । तर आयात रोकिएसँगै व्यापारीले चिनीको मुल्य ८० रूपैयाँसम्म पु¥याएका हुन् ।
राष्ट्रिय उपभोक्ता अधिकार अनुसन्धान मञ्चका अध्यक्ष माधव तिमिल्सेनाले दसैंको मुखमा दैनिक उपभोग्य वस्तुको मुल्य बढेर
उपभोक्तालाई असर परेको बताए । “चाडपर्वमा उपभोक्तालाई राहत दिने ठाउँमा सरकार आफैंले यातायातको भाडा बढाएर प्रत्यक्ष मार परेको छ,” उनले भने, “व्यवसायीले मूल्य बढेर आएको भन्दै मनपरी मूल्य बढाउँदा त्यसको असर उपभोक्ताले खेप्नुपरेको छ ।” चाडपर्वको बेला बजारमा वस्तु तथा सेवाको खरिद बिक्री धेरै हुँदा व्यवसायीले कालोबजारीसमेत गर्ने गरेका छन् ।
वाणिज्य, आपूर्ति तथा उपभोक्ता हित संरक्षण विभागका महानिर्देशक योगेन्द्र गौचनले चाडपर्वमा हुने कालोबजारी नियन्त्रण गर्न नियमितरूपमा अनुगमन गरिरहेको बताए । अत्यावश्यक वस्तुमा २० प्रतिशतभन्दा बढी नाफा खान नपाइने कानुनी व्यवस्था भए पनि व्यवसायीले दोव्बर तेव्बर मूल्य लिई उपभोक्ता ठग्ने गरेका छन् ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
