सरकारले बनायो ढुङ्गा,बालुवा र गिटीको उत्खननको नियमन गर्न समिति

होमल्याण्ड खबर

२०७५ कार्तिक ९ गते, शुक्रबार १३:२२ मा प्रकाशित

सरकारले ढुङ्गा, बालुवा र गिट्टीको उत्खनन र बिक्री प्रक्रियाको नियमन गर्नका लागि अनुगमन तथा समन्वय समिति गठन गरेको छ ।
सङ्घीय मामिला तथा सामान्य प्रशासन मन्त्रालयले ढुङ्गा, बालुवा र गिट्टीको उत्खननको नियमनका लागि जिल्ला समन्वय समितिका प्रमुखको संयोजकत्वमा समिति गठन गरिएको मन्त्रालय सहसचिव पुरुषोत्तम नेपालले जानकारी दिए । ढुङ्गा, बालुवा र गिट्टीको जथाभावी उत्खनन र बिक्री भएकाले नियन्त्रण गर्नका लागि समिति गठन गरिएको उनले बताए ।
समितिको सदस्यमा समन्वय उपप्रमुख, प्रमुख जिल्ला अधिकारी, जिल्ला प्रहरी प्रमुख, सशस्त्र प्रहरी प्रमुख, प्रदेशअन्तर्गत जिल्ला वन, वातावरण तथा भूसंरक्षण अनुगमन समितिले तोकेको कार्यालय प्रमुख, इञ्जिनियर र जिल्ला समन्वय अधिकारी सदस्यसचिव रहने व्यवस्था गरिएको छ ।
समितिले ढुङ्गा, बालुवा र गिट्टी उत्खननका सम्बन्धमा स्थानीय तहलाई आवश्यक निर्देशन दिनसक्ने छ । उनका अनुसार समितिले ढुङ्गा, बालुवा र गिट्टी उत्खनन गर्दा वातावरणीय अध्ययन प्रतिवेदनको शर्तको परिपालना गरे–नगरेको, स्वीकृत, विधि प्रक्रिया परिमाणबमोजिम उत्खनन र सङ्कलन भए–नभएको राजश्व चुहावट र चोरी निकासी भए–नभएको, ढुङ्गा, बालुवा र गिट्टीको मूल्य निर्धारण, क्रसर उद्योगले तोकेको मापदण्ड पूरा गरे–नगरेको जस्ता कार्य स्थानीय तह, उत्खनन सङ्कलनकर्तालाई गराउनेछ ।
समितिले दिएको निर्देशन पालना नगरे ढुङ्गा, बालुवा र गिट्टी उत्खननमा रोक लगाउने अधिकारसमेत समितिलाइ दिइएको सहसचिव नेपालले जानकारी गराए ।

सम्बन्धित खबर

प्रतिनिधिसभाका सचिव अधिकारीले ५ महिना नपुग्दै दिए राजीनामा

सभामुख घिमिरेद्वारा कम्बोडियन समकक्षीसँग भेट

सिनामंगलको होटलमा युवायुवती झुण्डिएको अवस्थामा मृत भेटिए

सुनको भाउ बढ्यो, तोलाको कति ?

धरहरा चढ्दा आजबाट शुल्क लाग्ने

रवि लामिछानेलाई अदालत उपस्थित गराइयो