पूर्वमन्त्री तथा वामपन्थी नेता पद्मरत्न तुलाधरको असामयिक निधन

होमल्याण्ड खबर

२०७५ कार्तिक १८ गते, आईतवार १५:१४ मा प्रकाशित

पूर्वमन्त्री तथा वामपन्थी नेता पद्मरत्न तुलाधरको ७७ वर्षको उमेरमा असामयिक निधन भएको छ । काठमाडौको थापाथलीस्थित नर्भिक अन्तर्राष्टिय अस्पतालमा नेता तुलाधरको निधन भएको हो ।

तुलाधर नेपाल भाषा तथा मानव अधिकार आन्दोलनका अगुवा हुन् । त्यति मात्रै होइन, उनी तत्कालीन समयमा चर्चा पाएको प्रचण्डपथको एउटा हाँगो मानिन्छन् ।

स्वास्थ्यमा समस्या आएपछि उनलाई गएको शुक्रबार साँझ माइतीघरस्थित अन्नपूर्ण न्यूरो अस्पतालमा भर्ना गरिएको हो । पछि उनलाई नर्भिक सारिएको थियो । नर्भिक अस्पतालका चिकित्सक आर.के. अग्रवाल र राजीव झालगायतको टोलीले उपचार गरिरहेको थियो। चिकित्सकहरुका अनुसार तुलाधरलाई मस्तिष्कघात भएको हो । परिवारका सदस्यका अनुसार तुलाधर छातीको गम्भीर सङ्क्रमणबाट बढी थलिएका थिए ।

एमाले र माओवादी केन्द्रबीच एकता भएपछि तुलाधर आफूले गरेको प्रयास अन्ततस् सफल भएको भन्दै निकै खुसी भएका थिए । उनले तत्कालिन माओवादी विद्रोहीलाई शान्ति प्रक्रियामा ल्याउने देखि नेकपा एकीकरणमा समेत आफ्नो प्रयासबारे स्मरण गराएका थिए ।

तुलाधरले आफुलाई भेट्न पुगेका नेकपाका नेतासँग, ‘जनयुद्धको समयमा माओवादीलाई वार्तामा ल्याउन माओवादीसँग वार्ता गर्न जाँदा यहि हो प्रचण्ड भनेर मलाई थुने । तर आज मेरो प्रयास सार्थक भएको छ । नेकपाले अब देशमा समृद्धिको नेतृत्व गर्नुपर्छ ’ भनेका थिए ।

आफू तीनपटक तत्कालिन एमालेको चुनाव चिन्ह सूर्यबाट चुनाव जितेको र स्वतन्त्र वामपन्थीकै हैसियतमा २०५२ सालमा स्वास्थ्यमन्त्री बन्दाको क्षण पनि उनले सम्झिएका थिए ।

नेपाल संवतलाई राष्ट्रिय मान्यता दिलाउन महत्वपूर्ण भूमिका खेलेका तुलाधरले नेपालको शान्ति प्रक्रियामा पनि ठूलो योगदान गरे । उनी पत्रकार तथा साहित्यकार पनि थिए । तुलाधरका श्रीमती, दुई छोरा र दुई छोरी छन् । उनको सोमबार शोभाभगवतीमा अन्तिम संस्कार गरिने बताइएको छ ।

सम्बन्धित खबर

दार्चुला जीप दुर्घटना : आठ जनाको मृत्यु

आज पनि ह्वात्तै घट्यो सुनको मूल्य, कतिमा हुँदैछ कारोबार ?

आत्मसमीक्षासहित अब कहिल्यै नझुक्किने प्रण गरेको छु : बाबुराम भट्टराई

सांसद दीपक मनाङेलाई सीआईबी लगियो

राष्ट्रपति पौडेलले कोप–२९ शिखर सम्मेलनलाई आज सम्बोधन गर्दै

ओली सरकार आफ्नै कारणले ढल्छ : माओवादी