न्याय खोज्दै निर्मलाका परिवार अनिश्चितकालीन धर्नामा

होमल्याण्ड खबर

२०७५ कार्तिक २५ गते, आईतवार ११:०० मा प्रकाशित

बलात्कारपछि हत्या गरिएकी कञ्चनपुरकी १३ वर्षीया बालिका निर्मला पन्तका बाबुआमा न्यायको खोजीमा अनिश्चितकालीन धर्ना सुरु गर्दैछन् । छोरीको हत्या भएको चार महिना हुन लाग्दासमेत सरकारले हत्यारालाई पक्राउ गरी कार्वाही गर्नेतर्फ खासै चासो नदेखाएपछि वाध्य भएर दबाब दिन निर्मलाको परिवार धर्नामा निस्किएको हो ।

निर्मलाका बुबा यज्ञराज पन्तले सरकारलाई दबाब दिन आइतबार बिहान ११ बजेदेखि जिल्ला प्रशासन कार्यालय कञ्चनपुरको कार्यालय अगाडि धर्ना बस्ने बताए । धर्ना बस्नुअघि महेन्द्रनगरको मदनचोकमा स्थानीय बासिन्दा, अधिकारकर्मी तथा परिवारका सदस्य भेला भएर नगरपरिक्रमा गरी जिल्ला प्रशासन कार्यालयमा पुग्ने कार्यक्रम छ ।

धर्ना कार्यक्रम हत्यारा पत्ता नलागुन्जेलसम्मका लागि अनिश्चितकालीन हुने पन्तले बताए ।
गत साउन १० गते साथीको घरमा गएकी निर्मलाको शव भोलिपल्ट नजिकैको उखुबारीमा बलात्कारपछि हत्या गरिएको अवस्थामा भेटिएको थियो ।
निर्मला हत्याकाण्ड पत्ता लगाउन बिभिन्न समिति बने पनि हत्यारा पत्ता लागेको छैन । बलात्कारको सम्बन्धमा चार जनाको डिएनएसमेत परीक्षण भएको थियो ।

दुई प्रहरी अधिकृतले यही काण्डमा जागिरबाट हात धोए पनि गृहमन्त्री र प्रधानमन्त्रीले नैतिकताका आधारमा केही पनि कदम चाल्न सकेका छैनन् ।

सम्बन्धित खबर

उद्योगहरूको बिजुली नकाट्ने प्राधिकरण बोर्डको निर्णय

कीर्तिपुरमा जित सुनिश्चित बनाउँदै माओवादी

हिजो सम्भवः नभए पछि रबि लामिछानेलाई आज साँझसम्म काठमाडौं ल्याइने

दुर्गा प्रसाईँलाई सर्वोच्चमा उपस्थित गराइयो

चुडामणिको मुद्दामा विपक्षी झिकाउन सर्वोच्चको आदेश

सर्वोच्चको बोर्डमा कालो रङ छ्यापेकी बिनु यादव प्रहरी नियन्त्रणमा