५ जेष्ठ २०८१, शनिबार
२०८१ बैशाख २३ गते, आईतवार १७:०० मा प्रकाशित
मुख्यमन्त्री खगराज अधिकारीले विश्वासको मत लिन बोलाइएको गण्डकी प्रदेशसभा बैठक आधा घण्टाका लागि स्थगित गरिएको छ ।
आइतबार प्रदेशसभा बैठकमा मुख्यमन्त्री अधिकारीले प्रदेशसभा सदस्यहरुसँग विश्वासको मत मागेका छन् । उनले राखेको विश्वासको मतसम्बन्धी प्रस्तावमा नेपाली कांग्रेस, नेकपा माओवादी केन्द्र र राष्ट्रिय प्रजातन्त्र पार्टीका संसदीय दलका नेताले धारणा राखेपछि सभामुख कृष्ण धितालले सभा आधा घण्टाका लागि स्थगित गरेका हुन् ।
प्रदेशसभा बैठकमा एमाले र माओवादीले मुख्यमन्त्रीलाई विश्वासको मत दिने भएका छन् । अधिकारी मन्त्रिपरिषदकै सदस्य स्वतन्त्र सांसद दीपक मनाङेले पनि विश्वासको मत दिनेछन् । नेपाली कांग्रेसले नदिने भएको छ भने राप्रपा तटस्थ रहने भएको छ ।
६० सदस्यीय गण्डकी प्रदेशसभामा मुख्यमन्त्रीले विश्वासको मत पाउन ३१ प्रदेशसभा सदस्यको समर्थन आवश्यक पर्छ । सत्तारुढ नेकपा एमालेसँग २२, नेकपा माओवादी केन्द्रसँग ७ र स्वतन्त्र सांसद दीपक मनाङेसमेत गरी उनको पक्षमा ३० प्रदेशसभा सदस्य देखिएका छन् ।
२७ सदस्य रहेको नेपाली कांग्रेस विपक्षमा छ भने २ सिट रहेको राप्रपा तटस्थ छ । माओवादी केन्द्रबाटै निर्वाचित भए पनि कृष्ण धिताल सभामुखको भूमिकामा छन् ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
