९ मंसिर २०८१, आईतवार
२०७५ मंसिर ४ गते, मंगलवार १३:४६ मा प्रकाशित
सहिद स्मारक ‘ए’ डिभिजन लिगको च्यासल युथ क्लबले फरवार्ड विमल घर्तीमगरलाई फुकुवा गरेको छ । यसै सिजन नवप्रवेशी च्यासलसँग अनुबन्ध भएका विमल बेल्जियममा ट्रायल दिन जानका लागि क्लब छाडेको क्लबका व्यवस्थापक शंकर व्यञ्जनकारले जानकारी दिए ।
“हामीसँग यही सर्तसहित सम्झौता गरेका थिए । उनले विदेश जानुपर्यो भने फुकुवा गर्नुपर्छ भनेर भनेका थिए,” मंगलबार च्यासलका व्यवस्थापक व्यञ्जनकारले भने, “उनी अहिले बेल्जियममा ट्रायलका लागि जाँदैछन् । त्यसैले हामीले उनलाई फुकुवा गरेका हौं । उनी नहुँदा टोलीमा केही असर त पर्छ तर हाम्रो बेन्च बलियो छ । सन्तोष साउखल आएका छन् । केही विदेशी खेलाडी पनि अनुबन्ध गर्ने योजनामा छौं ।”
मंगलबार बिहान च्यासल मैदानमा भएको अभ्यासमा पनि विमल अनुपस्थित थिए । यसअघि पनि विमलले बेल्जियमको आरएससी एन्डरलेच्टबाट पनि खेलेका थिए भने स्पेनको मार्वेला युनाइटेडमा ट्रायल दिएका थिए । यसै सिजन ‘ए’ डिभिजन लिगमा उक्लिएको च्यासल दोस्रो चरणको खेल सकिँदा १ अंकसहित नवौं स्थानमा छ । पहिलो खेलमा मछिन्द्रसँग गोलरहित बराबरी खेलेको थियो भने दोस्रो खेलमा त्रिभुवन आर्मीसँग १–० ले पराजित भएको थियो । यसबीचमा च्यासले राइनोकपको उपाधि उचालेको थियो ।
“बेल्जियमबाट प्रस्ताव आएको छ भन्ने सुनेको छु,” च्यासलका प्रशिक्षक राजुकाजी शाक्यले भने, “राम्रो खेलाडी नहुँदा विपक्षीलाई दबाब कम हुन्छ । तथापी हामीसँग अरु पनि राम्रा खेलाडी छन् ।”
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
