८ मंसिर २०८१, शनिबार
२०८१ कार्तिक २० गते, मंगलवार १४:४१ मा प्रकाशित
नेपाली कांग्रेसले मंसिर १६ गते हुने स्थानीय तहको उपनिर्वाचनको उम्मेदवार टुंग्याउन गृहकार्य अघि बढाएको छ । कुनै दलसँग पनि चुनावी गठबन्धन नगरी एक्लै लड्ने निर्णय गरेको कांग्रेसले उम्मेदवार टुंग्याउनेबारे छलफल भइरहेको कांग्रेस स्थानीय तह समन्वय विभाग प्रमुख मधु आचार्यले बताए ।
उनले तल्लो समितिबाट नाम आज आएपछि भोलि उपनिर्वाचन संयोजन समितिको बैठक बस्ने जानकारी दिए । कांग्रेसले महामन्त्री विश्वप्रकाश शर्माको नेतृत्वमा स्थानीय तह उपनिर्वाचन २०८१ केन्द्रीय संयोजन समिति गठन गरेको छ ।
उम्मेदवारबारे भोलि दिउँसो ३ बजे बस्ने बैठकले आवश्यक निर्णय लिने विभाग प्रमुख आचार्यले बताए । उनले भने, ‘अधिकांश स्थानबाट उम्मेदवारको नाममा सर्वसम्मत हुन्छ भन्ने लागेको छ । नभएका ठाउँमा प्रक्रियागत रुपमा आएकाहरुको विषयमा भोलिको बैठकले आवश्यक छलफल गर्छ । नामहरुबारे छलफल गरेर हामी चाँडै टुंग्याउँछौं ।’
उपनिर्वाचन हुने अधिकांश क्षेत्र कांग्रेसले जितेको भएकाले आफ्नो क्षेत्र सुरक्षित गर्दै थप गर्नुपर्ने दबाबमा कांग्रेस छ । निर्वाचन संयोजन समितिमा सहमहामन्त्रीहरु महालक्ष्मी उपाध्याय ‘डिना’, भीष्मराज आङ्देम्बे, महेन्द्र यादव, जीवन परियार, प्रवक्ता डा. प्रकाशशरण महत, केन्द्रीय सदस्य पुष्पा भुसाल, मीन विश्वकर्मा, मधु आचार्य सदस्य र प्रकाश शर्मा सदस्य सचिव छन् ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
