३० कार्तिक २०८१, शुक्रबार
२०८१ कार्तिक ३० गते, शुक्रबार १५:५६ मा प्रकाशित
कर्नाटक यू–१९ विरुद्धको एकदिवसीय सिरिजको दोस्रो खेलमा आयोजक नेपाल यू–१९ टोलीले ७ विकेटको जित निकालेको छ ।
शुक्रबार भएको खेलमा कर्नाटकले दिएको १ सय २२ रनको लक्ष्य नेपालले २५औँ ओभरमा तीन विकेट गुमाएर पूरा गर्यो ।
नेपाल यू–१९ टिमका लागि ओपनर आकाश त्रिपाठीले अर्धशतकीय पारी खेले । ७६ बलको सामना गरेका उनले ६ चौकासहित अविजित ५२ रनको पारी खेलेका हुन् । यस्तै, मयन यादवले ३२, नरेन भट्टले १४ र उत्तम थापा नटआउट १२ रन जोडे ।
त्यसअघि मूलपानी क्रिकेट मैदानमा टस जितेर ब्याटिङ रोजेको कर्नाटक यू–१९ टिम ३८.१ ओभरमा १ सय २१ रनमा अलआउट भयो ।
अन्तिम २२ रन बनाउँदा ७ विकेट गुमाएपछि कर्नाटक सस्तैमा समेटिएको हो । उसका लागि रिषाभले ४० र ओपनर प्रतीकले ३७ रन बनाए । बाँकी ब्याटरको प्रदर्शन भने सन्तोषजनक रहन सकेन ।
नेपालका लागि नरेन साउद र हेमन्त धामीले चार/चार तथा सन्तोष यादवले एक विकेट लिए । यो जितपछि पाँच खेलको सिरिज एक/एकको स्थितिमा आएको छ ।
सिरिजको पहिलो खेलमा नेपाल एक विकेटले पराजित भएको थियो । श्रृंखलाको तेस्रो खेल आइतबार हुने तालिका छ । नेपाल आसन्न संस्करणको यू–१९ एसिया कपको तयारीस्वरूप कर्नाटक–१९ सँग खेलिरहेको हो ।
एसिया कपमा नेपालले २९ नोभेम्बरमा श्रीलंका, १ डिसेम्बरमा बंगलादेश र ३ डिसेम्बरमा अफगानिस्तानसँग खेल्ने तालिका छ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
