२७ वर्षपछि नियमित सञ्चालनमा आयो टीकापुर विमानस्थल

होमल्याण्ड खबर

२०८१ पुष १ गते, सोमबार ११:२८ मा प्रकाशित

कैलालीको टीकापुर विमानस्थल नियमित सञ्चालनमा आएको छ। २७ वर्षदेखि बन्द रहेको विमानस्थल आइतवार सञ्चालनमा आएको हो।

आज चालक दलका ३ सहित ५ कर्मचारी र १२ यात्रु बोकेको तारा एयरको वाईटी १७०१ नम्बरको ट्विनअटर विमान दिउँसो पौने २ बजे टीकापुर विमानस्थलमा अवतरण गरेसँगै विमानस्थलमा नियमित हवाई उडान शुरू भएको छ।

पहिलो उडानमार्फत टीकापुर पुगेका संस्कृति, पर्यटन तथा नागरिक उड्डयन राज्यमन्त्री अरूणकुमार चौधरीलगायतलाई टीकापुर नगरपालिकाका प्रमुख रामलाल डगौरा, उद्योग वाणिज्य सङ्घ टीकापुरका उपाध्यक्ष कृष्ण बजगाईंलगायतले स्वागत गरेका थिए।

विमानस्थलमा सञ्चारकर्मीसँग टीकापुर नगरपालिकाका प्रमुख थारुले टीकापुरको विमानस्थल ओझेलमा परेको र ओझेलमा परेको विमानस्थल जसरी पनि चलाउनुपर्ने भनेर आफू लागिपरेको बताए।

उनले फलतः अहिले विमानस्थल सञ्चालनमा आएको र यो टीकापुरकै सम्पत्ति भएको बताए। पटक पटकको छलफलबाट विमानस्थल सञ्चालनमा ल्याउन सफल भएको उनले बताए। विमान अवतरणका क्रममा सयौँको सङ्ख्यामा उपस्थित स्थानीयले भव्य स्वागत गरेका थिए।

विमानस्थलमा प्रत्येक साता आइतवार र बिहीवार काठमाडौँ–नेपालगञ्ज–टीकापुर र टीकापुर–नेपालगञ्ज–काठमाडौँ उडान हुनेछ। टीकापुर नगरपालिका र तारा एयरबीच प्रत्येक उडानमा न्यूनतम १५ सिटको रकम सुनिश्चित गर्ने गरी सम्झौता भएको नगरप्रमुख डगौरा थारूले जानकारी दिए।

“यति एयरलाइन्सले काठमाडौँ–नेपालगञ्ज र त्यहाँबाट कनेक्टिङ फ्लाइटमार्फत तारा एयरले नेपालगञ्ज–टीकापुर उडान भर्नेछ। यसका लागि एकमुष्ट काठमाडौँ–टीकापुरको एकतर्फी भाडा ९ हजार रुपैयाँ निर्धारण गरिएको छ”, उनले भने।

उडानको टिकट बिक्रीका लागि आधिकारिक बिक्रेतामा पथिल होलिडेजलाई नियुक्त गरिएको छ। टीकापुरस्थित सिद्धार्थ होटल र काठमाडौँको तीनकुनेमा रहेको पथिल होलिडेजबाट पनि टिकट काट्न मिल्ने गरी व्यवस्था गरिएको छ।

साथै यात्रुहरूले यति एयरलाइन्सको एप, विभिन्न ट्राभल एजेन्सी, खल्ती, इसेवालगायतका माध्यमबाट टिकट खरिद गर्न पनि सक्नेछन्।

विमानस्थल सञ्चालनमा आएपछि धनगढी र नेपालगञ्ज विमानस्थल धाइरहेका टीकापुर नगरपालिका आसपासका कैलाली, सुर्खेत र बर्दियाका स्थानीयलाई सहज हुने अपेक्षा छ।

टीकापुर विमानस्थलमा हाल धावनमार्गमा ग्राभेल गरिएको छ। सिद्धार्थ बिजनेस ग्रुपका प्रमुख कार्यकारी अधिकृत कृष्णप्रसाद न्यौपानेले विमानस्थल सञ्चालनमा आएपछि टीकापुरलाई पर्यटकीय शहरका रूपमा विकास गर्न थप सहज हुनेमा विश्वास व्यक्त गरे।

सम्बन्धित खबर

निर्माण व्यवसायी र सिमेन्ट उत्पादक संघबीच सिमेन्टको मूल्य घटाउने सहमति

तोलामा २१०० रुपैयाँ बढ्यो सुनकाे मुल्य

४ सय रूपैयाँले बढ्याे सुनकाे मुल्य

सुनको मूल्य चार सय रुपैयाँले घट्यो