पाथीभरा केबलकार निर्माण यथास्थितिमा राख्न सर्वोच्चको आदेश

होमल्याण्ड खबर

२०८१ चैत्र १६ गते, आईतवार १२:५८ मा प्रकाशित

ताप्लेजुङको मुक्कुमलुङ (पाथीभरा) क्षेत्रमा केबलकार निर्माण कार्य यथास्थितिमा राख्न सर्वोच्च अदालतले आदेश दिएको छ।

न्यायाधीश शारंगा सुवेदीको एकल इजलासले अन्तरिम आदेश दिने वा नदिने भन्ने तय गर्न दुवै पक्षलाई छलफलका लागि बोलाएको छ। सर्वोच्चले चैत २६ गते दुवै पक्षलाई छलफलका लागि बोलाएको छ।

आदेशमा भनिएको छ, ‘निवेदकले अन्तरिम आदेश समेत जारी हुन माग गरेको सम्बन्धमा विचार गर्दा प्रस्तुत निवेदनमा उठाइएको विषयवस्तुको प्रकृति र गाम्भीर्य हेर्दा दुवै पक्षको सुनुवाइ गरी अन्तरिम आदेश जारी हुनुपर्ने हो वा होइन भन्ने विषयमा निष्कर्षमा पुग्न उपयुक्त हुने देखिएकाले हालसम्म भए गरेका कामकारबाहीहरू यथास्थितिमा राखी अन्तरिम आदेश सम्बन्धमा छलफलका लागि उपस्थित हुन मिति २०८१ चैत २६ गतेको पेशी तोकी सोको जानकारी विपक्षीहरू समेतलाई दिनु।’

यससँगै सर्वोच्चले पाथीभरा केबलकार निर्माणका विषयमा कारण देखाउ आदेश पनि दिएको छ। विपक्षीलाई १५ दिनभित्र लिखित जवाफ पेश गर्न भनेको छ।

स्थानीय यामबहादुर लिम्बू सहित आठ जनाले पाथीभरा क्षेत्रमा केबलकार बनाउने, बनाउन दिने लगायत सम्पर्ण कार्य तत्काल रोक्न अन्तरिम आदेश माग गर्दै सर्वोच्चमा रिट हालेका थिए। रिट निवेदकका तर्फबाट वरिष्ठ अधिवक्ता केदारप्रसाद दाहाल, नारायणप्रसाद देवकोटा, पदमबहादुर श्रेष्ठ र अधिवक्ताहरू दिलराज खनाल, सोम सापकोटा, प्रेमचन्द्र राई र जीतेन्द्रबहादुर मडैले बहस गरेका थिए।

यसबाहेक पाथीभरा केबलकार निर्माणको विषयलाई लिएर सर्वोच्चमा अन्य दुई मुद्दा विचाराधीन छन्।

सम्बन्धित खबर

दार्चुला केन्द्रविन्दु भएर भूकम्प

काठमाडौँमा हप्ताको दुई दिन सार्वजनिक बिदा दिन सुझाव

तिनकुनेमा अन्दाधुन्दा गोली चलाएर राज्यले हिंसा भड्कायो : राजेन्द्र लिङ्देन

साना देशहरुमाथि जोखिम बढ्दै छः प्रधानमन्त्री ओली

एनसेलले ल्यायो आकर्षक एनएसएल अफरहरु

वायु प्रदूषण बढेपछि स्वास्थ्य मन्त्रालयद्वारा सतर्कता अपनाउन आग्रह