२२ फाल्गुन २०८२, शुक्रबार
२०८२ माघ २४ गते, शुक्रबार १०:४९ मा प्रकाशित
आईसीसी टी-२० पुरुष विश्वकप क्रिकेट आइतवार देखि प्रारम्भ हुँदै छ । भारत र श्रीलंका संयुक्त आयोजक रहेको यस विश्वकपको पहिलो खेलमा नेपालले विश्व विजेता इङ्ल्याण्डसंग भिड्ने छ। यो खेल नेपालको लागि मात्र प्रतियोगिता नभएर सपनाको यात्रा पनि हो।
नेपालले इङ्ल्याण्डसंग प्रतिस्पर्धा गर्दै दोस्रोपटक टी-२० विश्वकप यात्रा प्रारम्भ गर्दैछ। सबै खेलहरू मुम्बईको वानखडे रंगशालामा हुनेछन् । नेपाली क्रिकेटप्रेमीहरूको आँखामा यो क्षण लामो समयदेखि प्रतिक्षा गरिएको छ।
नेपालले पहिलोपटक सन् २०१४ मा बंगलादेशमा विश्वकप खेलेको थियो। त्यसपछि दस वर्षसम्म अवसरको प्रतीक्षामा रह्यो। तर २०२४ को विश्वकपमा नेपालले दक्षिण अफ्रिका र बंगलादेशसँग शानदार खेल प्रदर्शन गर्दै आफ्नो क्षमतालाई विश्वमञ्चमा देखाएको थियो। विशेषगरी दक्षिण अफ्रिकासँगको खेलमा एक रनको अन्तरले हार र जीतको नजिक पुगेको त्यो खेल नेपाली क्रिकेटप्रेमीको स्मरणीय क्षण बनेको थियो।
नेपाल लगातार कप्तान रोहितकुमार पौडेलको नेतृत्वमा विश्वकप खेल्दै आएको छ। उनी मात्र होइन, सोमपाल कामीले तीनपटक विश्वकप खेल्ने इतिहासमा पहिलो नेपाली खेलाडी बन्ने गौरव हासिल गरेका छन्। यी खेलाडीहरूको कठिन मेहनत र लगावले नेपाल क्रिकेटलाई विश्व मानचित्रमा स्थापित गरिरहेको छ।
यस विश्वकपमा नेपाल समूह ‘सी’ मा छ। समूहमा नेपालसँगै दुईपटकको विजेता वेस्ट इन्डिज, एकपटकको विजेता इङ्ल्याण्ड, स्कटल्यान्ड र इटाली छन्। बंगलादेशले भारतमा विश्वकप खेल्न अस्वीकार गरेपछि स्कटल्यान्डले स्थान पाएको हो।
नेपाली खेलाडीहरूका लागि यो केवल खेल होइन, देशको गौरव हो। प्रत्येक बल, प्रत्येक रन, प्रत्येक विकेटमा हजारौं नेपालीको भावना जोडिएको छ। जसले गर्दा आइतवारको खेल, नेपाल क्रिकेटका लागि मात्र नभएर सम्पूर्ण नेपालीको लागि उत्सवको दिन बन्ने निश्चित छ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
