९ मंसिर २०८१, आईतवार
२०७५ कार्तिक १९ गते, सोमबार १२:२० मा प्रकाशित
सरकारले विगत १७ वर्षदेखि नेपालीहरूको महान चाड दसंै, तिहार र छठमा दिँदै आएको चिनीमा सहुलियत कटौती गरेको छ । २०५८ सालदेखि सुपथ पसलमार्फत चाडवाडमा उपभोक्तालाई राहत दिँदै आए पनि यस वर्षदेखि यस्तो सुविधा कटौती गरिएको हो ।
प्रतिनिधिसभाको सार्वजनिक लेखा समितिले चिनीको मूल्य प्रतिकेजी ६३ रुपैयाँ कायम गर्न निर्देशन दिएको थियो । तर, समितिको निर्देशन अवज्ञा गर्दै ७० रुपैयाँ कायम गरेको सरकारले हरेक वर्ष दसैं तिहारमा दिँदै आएको सहुलियत कटौतीसमेत गरेको छ । सरकारले सहुलियत नदिँदा उपभोक्ताले बजारमा प्रतिकेजी ८० देखि ९० रुपैयाँसम्म तिरेर महँगो मूल्यमा चिनी खरिद गर्नुपर्ने बाध्यता छ ।
उद्योग, वाणिज्य तथा आपूर्ति मन्त्रालयले ६३ रुपैयाँ चिनीको मूल्य कायम गर्न मन्त्रिपरिषद्मा प्रस्ताव लगेपनि हालसम्म कुनै निर्णय नगरेको र सहुलियत दिने कार्यविधिसमेत स्वीकृत नगरेकोले विगतमा दिँदै आएको छुट दिन नसकिएको मन्त्रालयका एक उच्च अधिकारीले जानकारी दिए । “मन्त्रिपरिषद्ले स्वीकृत गरेमात्र हामी दिन सक्छौं, आजका दिनसम्म सहुलियत दिने कार्यविधि स्वीकृति भएको छैन,” ती अधिकारीले भने । उपभोक्तालाई सहुलियत दिनका लागि मन्त्रालयले चालू आर्थिक वर्षको बजेटमा भने रकम विनियोजन गरेको छ ।
मन्त्रालयले साल्टट्रेडिङ कर्पारेसनलाई प्रतिकेजी चिनीमा पाँच रुपैयाँ र नुनमा प्रतिकेजी दुई रुपैयाँ छुट दिनका लागि १ करोड ५० लाख रुपैयाँ विनियोजन गरेको थियो । राष्ट्रिय उपभोक्ता मञ्च नेपालका अध्यक्ष प्रेमलाल महर्जनले उद्योग, वाणिज्य तथा आपूर्तिमन्त्री र प्रशासकहरूले उपभोक्ताको हित नचाहाँदा चाडपर्वमा उपभोक्ताले सहुलियत पाउन नसकेको बताए । “मन्त्रालयले बजेटमै चाडपर्वमा उपभोक्तालाई सहुलियत दिन रकम छुट्याएको छ,” उनले भने, “मन्त्रालयको अदूरदर्शी नीतिको कारणले गर्दा उपभोक्ताले महँगो मूल्यमा चिनी खरिद गर्नुपरेको छ ।” सरकारले प्रत्येक वर्ष चाडपर्वमा उपभोक्तालाई सुपथ पसलमार्फत सहुलियतदरमा दैनिक उपभोग्य वस्तुको वितरण गर्दै आएको थियो ।
उद्योग, वाणिज्य तथा आपूर्तिमन्त्री मातृकाप्रसाद यादवले चिनीमा प्रतिकेजी ७० रुपैयाँभन्दा बढी लिन नपाइने निर्णय गरेका थिए । सरकार आफैंले प्रतिकेजी चिनीमा पाँच रुपैयाँ दिने भनेर घोषणा गरे पनि कार्यान्वयन गर्न नसक्दा उपभोक्ताले महँगो मूल्यमा खरिद गर्नुपरेको छ । अहिले भने कर्पारेसनले प्रतिकेजीमा २ रुपैयाँ मूल्य घटाएर बिक्री खुला गरेको छ । कर्पारेसनका नायव महाप्रवन्धक कुमारराज भन्डारीले शनिवारदेखि प्रतिकेजी २ रुपैयाँ मूल्य घटाएर ६८ रुपैयाँमा बिक्री खुला गरिएको बताए ।
]
खाद्य संस्थानले चामल वितरण गरे पनि कर्पारेसनले चिनी वितरण गरेको थिएन । सरकारले असोज १२ देखि सुपथ मूल्य पसलमार्फत चिनी प्रतिकेजीमा पाँच रुपैयाँ छुट दिने घोषणा गरेको थियो । कर्पारेसनले महँगो मूल्यमा चिनी खरिद गरेकाले सस्तोमा बिक्री गर्न नसकेको मन्त्रालयको भनाइ छ । बजारमा प्रतिकेजी ५९ रुपैयाँमा पनि चिनी बिक्री भइरहेको छ । उद्योगीले फयाक्ट्री मूल्य प्रतिकेजी ६४ रुपैयाँमा चिनी वितरण गरेका छन् । कर्पारेसनसँग अहिले १७ हजार टन चिनी मौज्दात छ । कर्पारेसनले भारतबाट महँगो मूल्यमा उच्च गुणस्तरको चिनी खरिद गरेको थियो । खरिद मूल्यभन्दा सस्तोमा बजारमा चिनी वितरण भएकाले पनि कर्पारेसनको चिनी बिक्री हुन नसकेको हो । सरकारले केही समय अघि चिनी आयातमा प्रतिवन्ध लगाएकाले बजारमा चिनीको मूल्य महँगिएको हो ।
सरकारले २०५८ सालमा एकीकृत सुपथ पसलमार्फत नेपाल खाद्य संस्थान, नेशनल टे«डिङ लिमिटेड र साल्ट ट्रेडिङ कर्पारसनले बिक्री गरेको आधारमा छुट रकम उपलब्ध गराउँदै आएको थियो । २०६२-६३ मा आएर एकमुष्ठरूपमा रकम छुट्याएर उपभोक्तालाई सहुलियत दिने गरेको थियो ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
