सम्पत्ति शुद्धीकरणमा तानिए रवि लामिछाने र जिबी राई

होमल्याण्ड खबर

२०८० फाल्गुन ३ गते, बिहीबार १३:१७ मा प्रकाशित

पूर्व गृहमन्त्री एवम् राष्ट्रिय स्वतन्त्र पार्टी (रास्वपा)का सभापति रवि लामिछाने र ग्यालेक्सी फोरके टेलिभिजनका मालिक जितेन्द्र बहादुर (जिबी) राई सम्पत्ति शुद्धीकरणमा तानिएका छन् । प्रधानमन्त्री तथा मन्त्रिपरिषद् कार्यालय मातहत रहेको सम्पत्ति शुद्धीकरण अनुसन्धान विभागले उनीहरूको सम्पत्ति माथि छानबिन सुरु गरेको छ ।

लामिछाने र राईले हजारौँ बचतकर्ताको करोडौँ रुपैयाँ खाइदिएको भन्दै उजुरी परेपछि विभागले छानबिन अघि बढाएको हो । विभागले विभिन्न २० वटा बैंकहरूलाई पत्र लेखेर बैंकमा रहेको खाता विवरण तथा कागजात उपलब्ध गराउन भनेको हो ।

पत्रमा भनिएको छ, ‘सम्पत्ति शुद्धीकरण (मनि लाउण्डरिङ्ग) सम्बन्धी कसुरको जाँचबुझको सिलसिलामा आवश्यक परेको हुँदा त्यहाँ बैंकहरूमा निम्न व्यक्तिहरूको नाममा कुनै किसिमको खाता छ, छैन ? भए के–कुन प्रकारको खाता रहेको छ ? खाता विवरण (बैंक स्टेटमेन्ट) खाता खोल्दाको बखत पेस गरेका कागजातहरू (केवाइसी) र हालको मौज्दात समेतको सफ्ट कपी एक्सल सिटमा यस विभागमा इमेल ठेगाना मार्फत अनिवार्य रूपमा पठाई दिनुहुन अनुरोध गरिएको छ ।’

विभागले नेपाल बैंक, राष्ट्रिय वाणिज्य बैंक, नबिल बैंक, नेपाल इन्भेष्टमेन्ट मेगा बैंक, स्टाण्डर्ड चार्टर्ड बैंक, हिमालयन बैंक, नेपाल एसबिआई बैंक, एभरेष्ट बैंक, एनआइसी बैंक, कुमारी बैंक, लक्ष्मी सनराइज बैंक, सिद्धार्थ बैंक, कृषि विकास बैंक, ग्लोबल आइएमइ बैंक, सिटिजन्स बैंक, प्राइम कमर्सियल बैंक, एनएमबी बैंक, प्रभु बैंक, सानिमा बैंक र माच्छापुछ्रे बैंकलाई एकमुष्ट लेखेको पत्रमा रवि र जिबी राईको खाता विवरण उपलब्ध गराइदिन भनिएको छ । साथै विभागले उनीहरूले बैंकबाट ऋण लिएको भए सो को विवरण तथा ऋण लिँदा पेस गरेका सम्पूर्ण कागजातहरूको प्रमाणित प्रतिलिपिसमेत उपलब्ध गराई अनुसन्धानमा सहयोग गरिदिन भनेको छ ।

गोर्खा मिडिया नेटवर्क प्रा.लि.का नाममा सहकारी ऐनविपरित ऋण प्रवाह गराएका आरोप राईमाथि लागेको छ । राई सूर्य दर्शनलगायत सहकारी ठगी प्रकरणमा फरार छन् । नेपाल प्रहरीले उनीविरूद्ध डिफ्युजन नोटिस समेत जारी गरेको छ । लामिछाने राईका व्यापारिक साझेदार हुन् । ग्यालेक्सी फोरके टिभीमा राईसँग लामिछाने साझेदार थिए ।

सम्बन्धित खबर

आज तोलामा १ हजार रुपयाँले बढ्यो सुनको मुल्य

चार महिनामा सरकारी आम्दानी ३ खर्ब २९ अर्ब, खर्च ४ खर्ब १५ अर्ब

आज सुनको मुल्य घट्यो

प्रधानमन्त्री दैवी प्रकोप उद्धार कोषमा एक अर्ब ९० करोडभन्दा बढी रकम जम्मा

नेपालबाट पहिलोपटक बंगलादेश बिजुली निर्यात

सुन र चाँदीको मूल्य बढ्यो