३० असार २०८३, मंगलवार
२०८३ असार ३० गते, मंगलवार १७:०८ मा प्रकाशित
फिफा विश्वकप २०२६ अन्तर्गत इंग्ल्यान्ड र अर्जेन्टिनाबीच हुने बहुप्रतीक्षित सेमिफाइनलअघि अमेरिकाको एटलान्टामा सुरक्षा व्यवस्था कडा पारिएको छ ।
विश्व फुटबलका दुई पुराना प्रतिद्वन्द्वीबीच हुने खेलअघि ऐतिहासिक तथा राजनीतिक संवेदनशीलतालाई ध्यानमा राख्दै स्थानीय प्रहरीले अतिरिक्त सुरक्षाकर्मी र स्रोत परिचालन गरेको हो ।
इंग्ल्यान्ड र अर्जेन्टिनाबीचको प्रतिस्पर्धा केवल फुटबलमै सीमित छैन । सन् १९८२ मा दुवै देशबीच फकल्यान्ड (अर्जेन्टिनामा माल्भिनास) द्वीपसमूहलाई लिएर ७४ दिनसम्म युद्ध भएको थियो ।
उक्त युद्धमा ६४९ अर्जेन्टिनी सैनिक, २५५ बेलायती सैनिक तथा तीन सर्वसाधारणको ज्यान गएको थियो । द्वीपसमूहमाथिको सार्वभौमिकताको विवाद अझै समाधान भएको छैन ।
यसैबीच अर्जेन्टिनाका युद्धका पूर्वसैनिकहरूको महासंघले समर्थकलाई राजनीति होइन, फुटबलमै केन्द्रित हुन आग्रह गरेको छ । महासंघले सार्वभौमिकताको विषय अन्तर्राष्ट्रिय मञ्च र कूटनीतिक माध्यमबाट उठाइने भन्दै खेललाई राजनीतिक बहससँग नजोड्न अपिल गरेको हो ।
अन्तिम १६ मा इजिप्टलाई हराएपछि अर्जेन्टिनाका खेलाडीहरूले माल्भिनास द्वीपसमूह, डिएगो म्याराडोना र लियोनल मेसीको उल्लेख गरिएको गीत गाएको भिडियो सामाजिक सञ्जालमा चर्चामा आएको थियो ।
यसैबीच इंग्ल्यान्डका गोलरक्षक जोर्डन पिकफर्डले यो केवल फुटबल खेल भएको उल्लेख गर्दै मैदानभित्रको प्रदर्शनले नै सबै कुरा तय गर्ने बताएका छन् ।
एटलान्टा प्रहरीले अमेरिकामा रहेका इंग्ल्यान्ड समर्थकको व्यवहारको प्रशंसा गरेको छ ।
तर, इंग्ल्यान्डमै भने क्वाटरफाइनलमा नर्वेमाथिको जितपछि फुटबलसँग सम्बन्धित ५०० भन्दा बढी घटना र १०० भन्दा बढी पक्राउ परेकाले समर्थकलाई संयमित रहन पनि आग्रह गरिएको छ ।
-बीबीसीबाट
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
