लकडाउनमा कति बन्यो सडक र पुल ?

होमल्याण्ड खबर

२०७७ असार २४ गते, बुधबार ११:४२ मा प्रकाशित

काठमाडौं । लकडाउनका बेला अन्य पूर्वाधार निर्माणको काम सुस्त भएपनि मुलुकभर एक सय ७८ किलोमिटर सडक कालोपत्रे भएको छ । ३९ वटा पुल निर्माण भएका छन् । लकडाउनको यो अवधिमा १५ किलोमिटर सडकमा पिचमाथि पिच (लोभरले) गरिएको भने ७ किलोमिटर नयाँ पिच, ३ किलोमिटर ढलान, सडक किनारमा सुधार र रंगरोगनको काम भएको छ ।

अघिल्ला वर्षहरूमा पूर्वाधार निर्माण सम्बन्धी अधिकांश काम पछिल्लो तीन महिनाको अवधिमा हुने गरेको थियो । यस वर्ष भाइरसको प्रकोपले गर्दा धेरै आयोजना सञ्चालन हुन सकेनन् । बन्दाबन्दीमा गरिएको यो काम लक्ष्यको तुलनामा अत्यन्त कम हो । यसले गर्दा लक्ष्यअनुसार पूर्वाधार निर्माण हुन नसकेको हो । सरकारले चालु आर्थिक वर्ष करिब १ हजार २ सय किलोमिटर सडक कालोपत्रे गर्ने लक्ष्य सरकारको थियो । यो बेलामा डिभिजन सडक कार्यालय काठमाडौंले लक्ष्यको ८० प्रतिशत प्रगति हासिल गरेको छ ।

चाबहिल–गौशाला सडक खण्ड चालु आर्थिक वर्षमै पिच गर्ने गरी ठेक्का लागेको थियो । विद्युत् प्राधिकरणले बिजुलीका तार भूमिगत गर्न सडक प्रयोग गरेकाले समयमै सडक निर्माण हुन नसकेको विभागको दाबी छ । सडक खण्डको जयबागेश्वरी मित्रपार्क खण्डको २ सय मिटर पिच भएको छ । पुतली सडक र सुनधारा–वीरअस्पताल क्षेत्रको सडक पनि पिच गरिएको छ ।

विशेषतःबन्दाबन्दीको बेला काठमाडौंमा सडक सुधारको कामलाई प्राथमिकताका साथ अघि बढाइएको छ ।  बन्दाबन्दीका कारण पछिल्लो ३ महिनामा अन्य पूर्वाधार निर्माण कार्य सुस्त भएका कारण सडकको काम पनि थोरै भएको सडक विभागले जानकारी दिएको छ । निर्माण सामग्रीको उपलब्धता र क्याम्पमा रहेका कामदारको सहयोगमा सडक कालोपत्र गरिएको सडक विभागले जानकारी दिएको छ ।

सरकारले चालु आर्थिक वर्ष विभागलाई १ खर्ब २१ अर्ब ५४ करोड ४८ लाख बजेट विनियोजन भएको थियो । यसमध्ये असार १४ सम्म पुँजीगत खर्च करिब ३७ प्रतिशत मात्रै भएको छ । बन्दाबन्दीमा भौतिक पूर्वाधार निर्माणका काम ठप्प हुँदा चालु आर्थिक वर्ष सडक विभागको पुँजीगत खर्च निकै कम भएको हो ।

चालु आव सञ्चालनमा रहेका आयोजनातर्फ करिब ४० प्रतिशत मात्रै पुँजीगत खर्च हुन सक्ने विभागले अनुमान गरेको छ । आर्थिक वर्ष सकिन अब दुई सातामात्रै बाँकी छ । चालु आवमा पूरा हुन नसकेका आयोजनालाई आगामी आवमा अघि बढाउने विषयमा अध्ययन गरिरहेको विभागले जनाएको छ ।

निर्माण व्यवसायी महासंघका अध्यक्ष रवी सिंहले मुलुकभर करिब ५ हजार आयोजना सञ्चालन थिए । महामारीको कारण सबै आयोजना सुरु गर्न समस्या परेको अवस्थामा स्रोतसाधन तथा जनशक्ति उपलब्ध भएको स्थानमा अत्यावश्यक आयोजना मात्रै सञ्चालनमा ल्याइएको उनले बताए ।

सम्बन्धित खबर

अस्ट्रेलियाको राजदूतमा चित्रलेखा यादव नियुक्त

प्रतिनिधिसभाका सचिव सुरेश अधिकारीको राजीनामा स्वीकृत

सेयर बजार २६६७ अंकमा झर्‍यो, घट्यो कारोबार

एमालेले लिन मानेन काठमाडौं महानगरको जरिवाना पत्र

कांग्रेस कोषाध्यक्षमा उमेश श्रेष्ठ मनोनीत

रविमाथि अनुसन्धान गर्न १५ दिन म्याद थप