सभापतिजीले सोचेर र सच्याएर पछिल्ला निर्णय गर्नुभएको छ – डा शेखर कोइराला

विराटनगर विमानस्थलमा सञ्चारकर्मीहरूसँग डा कोइरालाले आफूहरु सहमतिमा पुग्न जतिसुकै विवाद गरे पनि अन्तिममा पार्टीले जे निर्णय गर्छ त्यो आधिकारिक हुने पनि बताए ।  उनले आवश्यकताका आधारमा मात्रै स्थानीय तहको निर्वाचनमा गठबन्धन गर्ने भन्ने केन्द्रको अन्तिम निर्णय नै आधिकारिक भएको स्पष्ट पार्दै यसअघि भनिएका सबै कुराहरुको अस्तित्व सकिएको पनि संकेत गरे ।

उनले आफूले केन्द्रले गरेका गलत निर्णयको मात्रै विरोध गरेको स्पष्ट पारे । उनले आफूले कहीँ कतै पनि भ्रातृ संगठन समानान्तर बनाउँछु भनेर नभनेकोसमेत स्पष्ट पारे ।  डा कोइरालाले भने, ‘भ्रातृ संगठन या शुभेच्छुक संस्थामा नियुक्त गर्दा न्यायपूर्ण हुनुपर्छ भनेको हुँ । म भागबन्डाको राजनीति गर्दिन भनेकै छु तर सभापतिजीले न्यायमुलक काम गर्नुपर्छ । समेट्न सक्नुपर्छ ।’उनले अगाडि भने, ‘कसले के भन्नुभयो, कुन पार्टीले के भन्छ म जान्दिन तर कांग्रेसले के निर्णय गर्छ, के भन्छ त्यो हाम्रो आधिकारिक कुरा हो ।’ डा कोइरालाले देश आर्थिक संकटमा नफसोस् भनेर सबैले सोच्ने बेला भएको भन्दै सचेतसमेत गराएका छन् ।