१६ कार्तिक २०८३, आईतवार
२०८३ कार्तिक १६ गते, आईतवार ११:४२ मा प्रकाशित
संयुक्त राष्ट्रसंघको आगामी महासचिव पदका लागि टर्कीले आफ्ना पूर्व विदेशमन्त्री फेरिदुन सिनिरलियोग्लूको नाम प्रस्ताव गरेको छ।
सरकारी सञ्चारमाध्यमका अनुसार टर्कीले औपचारिक रूपमा उनको नाम अघि सारेको हो। उनको उम्मेदवारीलाई टर्कीका राष्ट्रपति रेचेप तैयप एर्दोगानको समर्थन रहेको छ।
७० वर्षीय सिनिरलियोग्लू सन् २०१५ मा केही महिनाका लागि टर्कीका विदेशमन्त्री बनेका थिए। त्यसपछि सन् २०१६ देखि २०२३ सम्म उनले संयुक्त राष्ट्रसंघका लागि टर्कीका राजदूतका रूपमा काम गरेका थिए। हाल उनी भियनास्थित युरोपमा सुरक्षा तथा सहयोग संगठनका महासचिव छन्। उनको वर्तमान कार्यकाल सन् २०२७ को डिसेम्बरमा सकिँदैछ।
संयुक्त राष्ट्रसंघका वर्तमान महासचिव एन्टोनियो गुटेरेसको करिब १० वर्षे कार्यकाल पूरा भएपछि नयाँ महासचिव नियुक्त हुनेछन्। इरान, युक्रेन र गाजामा जारी द्वन्द्वका बीच संयुक्त राष्ट्रसंघको प्रभावकारितामाथि प्रश्न उठिरहेका बेला नयाँ महासचिव चयन हुन लागेको हो। आर्थिक सङ्कटका कारण संस्थाले मानवीय सहायता र विकास कार्यक्रमसमेत कटौती गर्नुपरेको छ।
संयुक्त राष्ट्रसंघको महासचिव चयनमा १५ सदस्यीय सुरक्षा परिषद्को महत्त्वपूर्ण भूमिका हुन्छ। परिषद्का पाँच स्थायी सदस्य अमेरिका, रुस, चीन, बेलायत र फ्रान्ससँग निषेधाधिकार अर्थात् भिटो प्रयोग गर्ने अधिकार छ। सुरक्षा परिषद्ले सिफारिस गरेपछि संयुक्त राष्ट्रसंघको १९३ सदस्यीय महासभाले अन्तिम स्वीकृति दिनुपर्ने व्यवस्था छ।
टर्कीका राष्ट्रपति एर्दोगानले लामो समयदेखि संयुक्त राष्ट्रसंघको सुरक्षा परिषद् पुनर्संरचनाको माग गर्दै आएका छन्। उनले पाँच स्थायी सदस्यको प्रभाव र वर्चस्वको आलोचना गर्दै आएका छन्। त्यसैले सिनिरलियोग्लूको उम्मेदवारीलाई पनि सुरक्षा परिषद् सुधारको यही मुद्दासँग जोडेर हेरिएको छ। तर उनको उम्मेदवारीको बाटो सहज नहुने देखिएको छ। टर्कीको छिमेकी मुलुक ग्रिसले उनको उम्मेदवारीप्रति असहमति जनाउन सक्ने अनुमान गरिएको छ। ग्रिस हाल सुरक्षा परिषद्को निर्वाचित सदस्य हो। यसैगरी इजरायलबाट पनि विरोध हुन सक्ने सम्भावना औँल्याइएको छ।
गुटेरेसको स्थान लिन सिनिरलियोग्लूसहित अन्य उम्मेदवार पनि प्रतिस्पर्धामा छन्। समाचारअनुसार यस पदका लागि थप सात जनाले उम्मेदवारी दिएका छन्। संयुक्त राष्ट्रसंघको शीर्ष पदमा क्षेत्रीय प्रतिनिधित्वलाई पालैपालो अवसर दिने अनौपचारिक परम्पराअनुसार यसपटक ल्याटिन अमेरिका तथा क्यारेबियन क्षेत्रका उम्मेदवारले पनि अवसर पाउन सक्ने सम्भावना छ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
