३ मंसिर २०८१, सोमबार
२०७६ माघ ७ गते, मंगलवार १२:२७ मा प्रकाशित
संघीय संसदको प्रमुख प्रतिपक्षी दल नेपाली कांग्रेसले प्रतिनिधिसभाको भावी सभामुख पदका लागि उम्मेदवारी नदिने भएको छ । मंगलबार बिहान बसेको कांग्रेस संसदीय दलको बैठकले सभामुखमा उम्मेदवारी नदिने निर्णय गरेको हो ।
प्रतिनिधिसभामा स्पष्ट बहुमत रहेको सत्तारुढ दल नेपाल कम्युनिस्ट पार्टीले अग्नि सापकोटालाई सभामुखको उम्मेदवार बनाउने निर्णय गरिसकेको छ । संघीय संसद सचिवालयले जारी गरेको निर्वाचन कार्यतालिकाअनुसार सापकोटाले मंगलबार बिहान सभामुखका लागि उम्मेदवारी समेत दर्ता गरिसकेका छन् ।
सभामुखका लागि नेकपाका उम्मेदवार सापकोटालाई संघीय संसदको चौठो ठूलो दल राष्ट्रिय जनता पार्टी (राजपा) नेपालले समेत समर्थन गरेको छ । राजपकाको समर्थनसँगै सभामुख निर्वाचनका लागि नेकपा उम्मेदवार सापकोटाको पक्षमा दुई तिहाइ बहुमत जुटेको छ । यद्यपि, नेकपा सांसद सापकोटा निर्विरोध निर्वाचित हुने संभावना पनि छ ।
प्रतिनिधिसभाको दोस्रो ठूलो दल कांग्रेसले उम्मेदवार नउठाउने निर्णय गरेपछि सापकोटा निर्विरोध निर्वाचित हुने संभावना बढेको हो ।
संघीय संसद सचिवालयले जारी गरेको निर्वाचन कार्यतालिकाअनुसार मंगलबार दिउँसो २ बजेसम्म मात्रै सभामुख पदका लागि उम्मेदवारी दर्ता गर्न सकिने छ ।
सचिवालयले मंगलबार दिउँसो साढे २ बजे नै सभामुखको उम्मेदवारको अन्तिम सूची प्रकाशन गर्ने छ ।
प्रतिनिधिसभाको माघ १२ गते बस्ने बैठकमा सभामुख निर्वाचनका लागि उम्मेदवारहरुको प्रस्ताव निर्णयार्थ पेश गरिने छ ।
एउटा मात्रै उम्मेदावरी परेका हकमा भने निर्विरोध निर्वाचित भएको घोषणा गरिने छ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
