नेम्वाङ र देवकोटाद्वारा संविधान संशोधन कार्यदलमा बस्न अस्वीकार

होमल्याण्ड खबर

२०७६ फाल्गुन १२ गते, सोमबार १५:५६ मा प्रकाशित

संघीय संसदको माथिल्लो सदन (राष्ट्रिय सभा)का सदस्य पनि प्रधानमन्त्री बन्न पाउने गरी संविधान संशोधन गर्न भनेर अध्ययनका लागि गठन गरिएको भनिएको कार्यदलमा बस्न नेकपाका २ जना नेताले अस्वीकार गरेका छन् ।

नेकपा सचिवालय बैठकले संविधान संशोधन गर्न भनेर वरिष्ठ नेता माधव कुमार नेपालको संयोजकत्वमा ३ सदस्यीय कार्यदल गठन गर्ने निर्णय गरेको विषय सार्वजनिक भएको थियो । नेकपा नेताहरुले औपचारिक रुपमा कार्यदल गठन भएको अस्वीकार गर्दै आए पनि संयोजक भनिएका नेता नेपालले भने सोमबार कार्यदलको बैठक बोलाएका थिए ।

नेता नेपालले सोमबार आफ्नो निजी निवासमा कार्यदलका सदस्य सुवास नेम्वाङ र खिमलाल देवकोटालाई बोलाएका थिए । तर, नेम्वाङ र देवकोटाले भने नेपाललाई भेटेर आफूहरु कार्यदलमा बस्न नसक्ने बताएका छन् ।

नेकपाले उपाध्यक्ष बामदेव गौतमको चाहनाअनुसार राष्ट्रिय सभा सदस्य पनि प्रधानमन्त्री बन्न पाउने गरी संविधान संशोधनका लागि अध्ययन कार्यदल बनाएको थियो ।

२०६४ सालमा भएको आम निर्वाचनमा पत्यक्षतर्फ चुनाव लडेर पराजित भएका गौतम आफू प्रधानमन्त्री बन्ने सुनिश्चित भएपछि मात्रै राष्ट्रियसभामा जान तयार रहेको बताउँदै आएका छन् ।

राष्ट्रपतिबाट मनोनित राष्ट्रिय सभा सदस्य (हाल अर्थमन्त्री रहेका) डा. युवराज खतिवडाको पदावधि सकिन लाग्दा नेकपाले गौतमलाई राष्ट्रिय सदस्य बन्न प्रस्ताव गरेको छ । तर, गौतमले भने प्रधानमन्त्री बन्ने सुनिश्चित भएपछि मात्रै संसद प्रवेश गर्ने जनाउँदै आएका छन् ।

सम्बन्धित खबर

प्रधानमन्त्रीद्वारा पूर्वसभामुख ढुङ्गानाप्रति श्रद्धाञ्जलि अर्पण

प्रदूषणले भारतको राजधानीका विद्यालय बन्द, अनलाइन कक्षा सुरु

आज तोलामा १ हजार रुपयाँले बढ्यो सुनको मुल्य

बाइडेनद्वारा युक्रेनलाई रुसभित्र मिसाइलहरू प्रहार गर्न अनुमति

पूर्वसभामुख ढुंगानाको निधनको शोकमा आज सार्वजनिक बिदा दिने सरकारको निर्णय

मुख्यसचिव अर्यालले दिए राजीनामा