१० मंसिर २०८१, सोमबार
२०७६ फाल्गुन १३ गते, मंगलवार १०:१२ मा प्रकाशित
एसीसी ईस्टर्न रिजन टी–ट्वान्टी क्रिकेटमा सहभागी हुन नेपाली राष्ट्रिय टोली बिहीबार थाइल्याण्ड प्रस्थान गर्ने भएको छ।
प्रतियोगिताको उपाधि जित्ने लक्ष्य लिएको नेपाली टिम आगामी बिहीबार त्यसतर्फ जान लागेको नेपाल क्रिकेट संघ क्यानका प्रवक्ता अशोकनाथ प्याकुरेलले बताए। प्रतियोगितामा नेपालसहित थाइल्याण्ड, मलेसिया, सिंगापुर र हङकङले प्रतिस्पर्धा गर्ने छन्।
नेपालले पहिलो खेल फागुन १७ गते मलेसियासँग र दोस्रो खेल १८ गते हङकङसँग खेल्नेछ। २१ गते थाइल्याण्डसँग तथा अन्तिम खेलमा २३ गते सिंगापुरसँग भिड्नेछ।
राष्ट्रिय टोलीमा भुवन कार्कीले पुनरागमन गर्दा नियमित सदस्य रोहित कुमार पौडेल बाहिर छन्। भुवन कार्कीले सन् २०१५ यता टोलीमा स्थान बनाउन सकेका थिएनन्। भुवनले पछिल्लो पटक नामिबियामा भएको आईसीसी डिभिजन–२ खेलेका थिए। किशोर महतो पहिलो पटक टिममा परेका हुन्।
इस्टर्न र वेस्टर्न रिजनबाट छनोट भएका २–२ टोलीले मलेसियामा अगस्टमा हुने एसिया कप टी–२० को छनोटमा भाग लिनेछन्। टी–२० एसिया कप सेप्टेम्बर २०२० मा पाकिस्तानमा हुनेछ। एसिया कपका लागि भारत, पाकिस्तान, अफगानिस्तान, बङ्लादेश र श्रीलंका सिधै छनोट भएका छन्।
नेपाली टोलीः ज्ञानेन्द्र मल्ल (कप्तान) पारस खड्का, दिपेन्द्र सिंह ऐरी (उपकप्तान), आरिफ शेख, बिनोद भण्डारी, सन्दीप लामिछाने, करण केसी, अभिनास बोहरा, कुशल मल्ल, पवन सरार्फ, सुशन भारी, किशोर महतो, भुवन कार्की र सन्दीप जोरा।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
