३ मंसिर २०८१, सोमबार
२०७६ फाल्गुन १३ गते, मंगलवार १०:३९ मा प्रकाशित
उपप्रधान एवम् रक्षामन्त्री ईश्वर पोखरेलले वामदेव गौतमलाई प्रधानमन्त्री बन्न बाटो खोल्ने गरी हुने भनिएको संविधान संशोधनको विषयको विरोध गरेका छन् ।
पोखरेलले ट्वीट गर्दै संविधान संशोधनको विषयलाई ढाँट छलफलको संज्ञा दिएका हुन् ।
सत्तारूढ नेकपाले संविधान संशोधनका लागि थालेको गृहकार्यप्रति नेकपाका नेता समेत रहेका मन्त्री पोखरेलले आपत्ति जनाएका छन् ।
उनले संशोधनको गृहकार्य नाजायज भएको टिप्पणी गर्दै यसलाई ढाँटछलको संज्ञा दिएका छन् ।
‘अभ्यास, अनुभव र औचित्यका आधारमा मात्र संविधान संशोधन हुनसक्ने कुरा गर्दै आएकाहरूबाट यतिबेला एकाएक संविधान संशोधनको कुरा सुनिँदैछ’, पोखरेलले भनेका छन्, ‘मानिसहरू यो सुनेर उदेक मान्दैछन् ।’
संविधान संशोधनको गृहकार्य थाल्नुअघि त्यो केका लागि भनेर प्रष्ट पार्नुपर्ने पोखरेलको भनाइ छ । ढाँट र छल गरेर धेरै दिन नटिक्ने भन्दै उनले राजनीति गरे पनि जुवा नखेल्ने चेतावनी दिएका छन् ।
‘केका लागि संशोधन ! खराखरी बहस गर्नेबेला आएजस्तो छ । कुरा लुकाएर, ढाँटछल गरेर कति दिन चल्छ, कसरी चल्छ ? राजनीति गरिन्छ, जुवा खेलिन्न !’, पोखरेलले भनेका छन् ।
नेकपाले हालै संविधान संशोधनका लागि वरिष्ठ नेता माधवकुमार नेपालको संयोजकत्वमा कार्यदल गठन गरेको समाचार बाहिरिएको थियो ।
संविधान संशोधनको गृहकार्यका निम्ति यस्तो कार्यदल गठन गरिए पनि स्वयं नेकपाभित्रै यसको चर्को विरोध भएको छ । कार्यदल सदस्यहरूले नै संविधानको औचित्यमाथि प्रश्न उठाउँदै त्यसमा बस्न इन्कार गरेका छन् ।
नेकपा उपाध्यक्ष गौतमलाई राष्ट्रियसभा सदस्यमा मनोनीत गरेर प्रधानमन्त्री बनाउने योजनाअनुरूप एकाएक संविधान संशोधनको विषय आएको अधिकांशको बुझाइ छ । संवैधानिक व्यवस्थाअनुसार प्रतिनिधिसभा सदस्यमात्र प्रधानमन्त्रीको उम्मेदवार हुन पाउँछ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
