३ मंसिर २०८१, सोमबार
२०७७ बैशाख १५ गते, सोमबार १६:२६ मा प्रकाशित
सत्तारुढ नेपाल कम्युनिस्ट पार्टी (नेकपा)मा उत्पन्न पछिल्लो गतिरोधका विषयमा नेताहरुबीच दुई पक्षीय तथा समूहगत छलफलहरु जारी छन् ।
सोमबार मात्रै प्रधानमन्त्री तथा नेकपा अध्यक्ष केपी शर्मा ओली र वरिष्ठ नेता माधव कुमार नेपालबीच भेटवार्ता भयो । दुवै नेताबीच भेटवार्ता सकिएपछि अहिले नेता नेपालको कोटेश्वरस्थित निवासमा ओली र नेपाल पक्षका नेताहरुको छलफल चलिरहेको छ ।
यसैबीच पार्टीका अर्का अध्यक्ष पुष्पकमल दाहाल (प्रचण्ड) र वरिष्ठ नेता झलनाथ खनालबीच पनि सोमबार छलफल भएको छ ।
वरिष्ठ नेता खनाल अध्यक्ष प्रचण्डलाई भेट्न उनको निवास खुमलटार पुगेका थिए ।
अध्यक्ष प्रचण्ड र नेता खनालबीच पार्टीको स्थायी कमिटी बैठकका विषयमा छलफल भएको जनाइएको छ । अध्यक्ष तथा प्रधानमन्त्री ओलीले स्थायी कमिटी बैठक बोलाउन नचाहेको अवस्था चाल्ने कदमबारे पनि दुई नेताबीच छलफल भएको खुमलटार स्रोतले जानकारी दिएको छ ।
यस्तै, नेता नेपालको कोटेश्वरस्थित निवासमा पार्टीमा देखिएको विवाद समाधानका विषयमा छलफल भइरहेको जनाइएको छ ।
अघिल्लो हप्ता मन्त्रिपरिषद बैठकले २ वटा विवादित अध्यादेश ल्याएपछि नेकपामा आन्तरिक विवाद चर्किदै गएको छ । पार्टी भित्रकै नेताहरुको दवावका कारण सरकारले राजनीतिक दल र संवैधानिक परिषदसम्बन्धी २ विवादित अध्यादेश फिर्ता लिने निर्णय गरेको थियो भने राष्ट्रपति विद्यादेवी भण्डारीले सरकारको सिफारिसमा दुवै अध्यादेश खारेज गरिसकेकी छन् ।
तर, प्रधानमन्त्री ओलीको ‘निर्देशन’मा साबिकको समाजवादी पार्टी फुटाउनका लागि पूर्व राज्यमन्त्री समेत रहेका डा सुरेन्द्र यादवलाई अपहरणको शैलीमा महोत्तरीबाट काठमाडौं पुर्याएको विषयलाई लिएर नेकपामा विवाद बढेको छ ।
नेकपाका २० जना स्थायी कमिटी सदस्यहरुले तत्काल स्थायी कमिटीको बैठक माग गर्दै प्रधानमन्त्री समेत रहेका अध्यक्ष ओलीलाई पत्र नै बुझाइ सकेका छन् ।
प्रधानमन्त्री ओली तत्काल स्थायी कमिटी बैठक बोलाउन चाहँदैनन् । ओली बाहेक अर्का अध्यक्ष प्रचण्ड, वरिष्ठ नेता खनाल, नेपाल, उपाध्यक्ष वामदेव गौतमलगायत नेताहरु भने तत्काल स्थायी कमिटी बैठक बोलाउनुपर्ने पक्षमा छन् ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
