सुरुवाती अग्रता जोगाउन नसक्दा युभेन्टस पराजित

एजेन्सी : इटालियन सिरी ए फुटबल अन्तर्गत बिहीबार राती भएको खेलमा घरेलु टोली उडिनेस लिगको शीर्षस्थानमा रहेको युभेन्टसलाई २-१ ले पराजित गरेको छ ।

पहिलो हाफमै अग्रता लिएपनि युभेन्टसले जित दर्ता गर्न सकेन । दोस्रो हाफमा घरेलु टोलीले उत्कृष्ट पुनरागमन गरेपछि युभेन्टस स्तब्ध बन्यो । खेलको ४२ औं मिनेटमा युभेन्टसले अग्रता लिएको थियो । डिफेन्डर म्याथिस डे लिग्टले गोल गर्दै पाहुना टोलीलाई अग्रता दिलाएका थिए ।

दोस्रो हाफको सुरुवातमै घरेलु टोलीले गोल गर्दै खेलमा फर्कने संकेत दियो । इलिजा नेस्त्रोरोभ्सकीले हेडरमार्फत गोल गर्दै घरेलु ट‍ोलीलाई खेल बराबरीमा ल्याएका थिए । दोस्रो हाफको इन्ज्युरी समयमा सेको फोफानाले उत्कृष्ट गोल गर्दै युभेन्टसलाई स्तब्ध पारे ।

यस हारका बाबजुद पनि युभेन्टसले शीर्षस्थानमा ६ अंकको अग्रता बनाएको छ । युभेन्टसको ३५ खेलमा ८० अंक छ । भने दोस्रो स्थानको एटलान्टाको ३५ खेलमा ७४ अंक रहेको छ । यता उडिनेस भने यस जितसँगै ३५ खेलमा ३९ अंक रहेको छ ।