छलफलका लागि उपस्थित हुन ओली र प्रचण्डलाई निर्वाचन आयोगको पत्र

होमल्याण्ड खबर

२०७७ माघ १५ गते, बिहीबार १४:२४ मा प्रकाशित

निर्वाचन आयोगले नेपाल कम्युनिस्ट पार्टी (नेकपा)का दुई पक्षलाई छलफलका लागि बोलाएको छ । आयोगले केपी शर्मा ओली र पुष्पकमल दाहाल प्रचण्डलाई छुट्टा–छुट्टै पत्र लेखी शुक्रबार बिहान ११ बजे छलफलका लागि बोलाएको हो । निर्वाचन सम्बन्धी छलफलका लागि अध्यक्ष र अध्यक्षले तोकेका आधिकारिक व्यक्ति गरी ५/५ जनालाई बोलाएको हो ।

निर्वाचन आयोगले ओली र प्रचण्डलाई पठाएको पत्रमा निर्वाचनसम्बन्धी छलफल गर्ने मात्रै भनिएको छ । पत्रमा दलसम्बन्धी विवादबारे छलफल गर्ने भनिएको छैन । यद्यपि अहिले नेकपामा दलसम्बन्धी विवाद समेत भएकाले त्यसमा समेत छलफल हुन सक्ने आयोगका एक अधिकारीले जानकारी दिए । प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गत पुस ५ गते प्रतिनिधि सभा विघटन गरी आगामी वैशाख १७ र २७ गते आम निर्वाचन (मध्यावधि)को मिति तोकेकी थिइन् । संसद विघटनपछि सत्तारुढ नेकपा भने व्यवहारिक रुपमा विभाजित भइसकेको छ । विभाजित नेकपाको एउटा समूहको नेतृत्व ओलीले गरिरहेका छन् भने अर्को समूहको नेतृत्व प्रचण्ड र माधव कुमार नेपालले गरिरहेका छन् ।

विभाजित नेकपाका दुवै समूहले आफूहरु आधिकारिक भएको भन्दै निर्वाचन चिन्ह (सूर्य) र पार्टीको नाम (नेपाल कम्युनिस्ट पार्टी ‘नेकपा’) आफूले पाउनुपर्ने दाबी गरिरहेका छन् । दुवै पक्षले आधिकारिता दाबीका लागि निर्वाचन आयोगमा दिएको पत्रका सन्दर्भमा भने आयोगले यसअघि नै ‘निर्णय’ गरिसकेको छ । निर्वाचन आयोगले नेकपाका दुवै पक्षको दाबी नपुग्ने निर्णय गरेको हो ।

सम्बन्धित खबर

ऊर्जामन्त्री खड्का र विश्व खाद्य संगठनका प्रतिनिधिबीच भेटवार्ता

दुर्गा प्रसाईं भक्तपुरबाट पक्राउ

स्थानीय तह उपनिर्वाचन : उम्मेदवारको नामावली प्रकाशन आज

प्रधानमन्त्रीद्वारा पूर्वसभामुख ढुङ्गानाप्रति श्रद्धाञ्जलि अर्पण

मुख्यसचिव अर्यालले दिए राजीनामा

भ्रष्टाचारमा सफाइ पाएपछि योजना आयोगमा हाजिर भए वैकुण्ठ अर्याल