४ मंसिर २०८१, मंगलवार
२०७७ फाल्गुन २६ गते, बुधबार १६:०४ मा प्रकाशित
केपी शर्मा ओली र माधव कुमार नेपाल पक्षका कार्यकर्ताहरुबीच कुटाकुट भएपछि कैलालीको धनगढीस्थित नेकपा एमालेको सुदूरपश्चिम प्रदेश कार्यालयमा प्रहरी खटाइएको छ ।
पार्टीको प्रदेश इञ्चार्जको नेमप्लेटको विषयलाई लिएर बुधबार दिउँसो एमालेका दुई समूह ओली र नेपालका कार्यकर्ताबीच झडप भएको हो ।
पूर्व माओवादी नेता लेखराज भट्टको नेमप्लेटको विषयलाई लिएर नेकपा एमालेका दुई समूहबीच झडपको स्थिति सिर्जना भएको थियो ।
पार्टी कार्यालयमा प्रदेश इञ्चार्जको कार्यकक्ष बाहिर लेखराज भट्टको नेमप्लेट राखिए पछि माधव नेपाल पक्षका कार्यकर्ताले नेमप्लेट हटाएका थिए ।
नेपाल समूहका कार्यकर्ताले पार्टीको सुदूरपश्चिम प्रदेश इञ्चार्ज भीम रावल भएको भन्दै लेखराज भट्टको नेमप्लेट हटाएका थिए ।
लेखराज भट्टको नेमप्लेट हटाइए पनि केपी शर्मा ओली पक्षका कार्यकर्ताहरु प्रतिकारमा उत्रिएका हुन् ।
ओली पक्षका कार्यकर्ताहरुले भीम रावलविरुद्ध नाराबाजी गर्दै नेमप्लेट हटाउने कार्यको प्रतिकार गरेका थिए । ‘केपी ओली- जिन्दावाद, लेखराज भट्ट- जिन्दावाद, भीम रावल- मुर्दावाद’ भन्दै ओली पक्षका कार्यकर्ताहरुले नाराबाजी गरेका थिए ।
नाराबाजीकै बीच दुवै पक्षका कार्यकर्ता कुटाकुटमै उत्रिएका थिए । दुवै समूहका कार्यकर्ताबीच कुटाकुट भएपछि स्थिति थप बिग्रिन नदिन प्रहरी परिचालन गरिएको छ ।
स्थितिलाई नियन्त्रणमा लिन जिल्ला प्रहरी कार्यालय कैलालीका डीएसपी प्रतिक विष्टको नेतृत्वमा ठूलो संख्यामा प्रहरी परिचालन गरिएको छ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
