९ मंसिर २०८१, आईतवार
२०७५ भाद्र २८ गते, बिहीबार १३:११ मा प्रकाशित
गाउँको समृद्धि पर्यटनसँग जोड्ने उद्देश्यका साथ अगाडि बढिरहेको उदयपुरको लिम्चुङबुङ गाउँपालिकाले विश्वको सर्वोच्च शिखर सगरमाथा हेर्ने विशेष महत्वको एभरेस्ट भ्यू टावर निर्माणको काम अगाडि सारेको छ । यसै सिलसिलामा दोबाटे भ्युटपमा लिम्चुङबुङ पार्कसँगै निर्माण हुन लागेको भ्यू टावरको डीपीआर सर्भेको थ्रीडी प्लान भिडियो क्लिप तयार भएको छ ।
पर्यटक भित्र्याउने र गाउँपालिकाको मौलिक पहिचान झल्काउने उद्देश्यले टावरको निर्माण गर्न लागिएको गाउँपालिकाका प्रमुख मेजरकुमार राईले बताए ।
सबै जातजाति, धर्म संस्कृति र प्राकृतिक एवं मौलिक विषयवस्तुको प्रतीकका रूपमा निर्माण गरिने २७ फिट अग्लो भ्यू टावरबाट महालङ्गुर हिमशृङ्खलाको अवलोकन गर्न सकिन्छ । विश्वको सर्वोच्च शिखर सगरमाथा, कन्चनजङ्गा, मकालु, जुगल, गौरीशङ्कर, चोयो, चारपाटे हिमाल, ल्होत्सेलगायतका हिमाल, सुनकोसी, हलेसी आँगनमा, तुवाचुङ, दिक्तेल, भोजपुर, सोलु, ओखलढुङ्गा र परपरका तराई मधेसका फाँटहरू देखिन्छन् । मनमोहक दृश्यहरू दूरबिनबाट नजिकै ल्याएर अवलोकन गर्ने व्यवस्था गरिनेछ ।
किराँत समुदाय र भाषाको बाहुल्य रहेकाले उनीहरूको संस्कृतिलाई महìव दिँदै टावरको माथिल्लो भागमा वाबु (चिन्डो) राखिने र टावरको चार भागमा बुद्ध, शिव, माङ्खिमलगायतका सबै जाति, धर्म, संस्कार, संस्कृतिका प्रतीक राखिनेछन् । तामाङ र शेर्पा समुदायको पुरानो उद्गम थलोको इतिहासलाई जीवित पार्न पार्कको तल्लो भागलाई बुद्ध कलर गरिने भएको छ ।
टावरसँगै एक ग्राउन्ड हल बन्ने र हलमा चिया, कफी लिँदै बस्ने र हलका भित्तालाई अध्ययनमूलक चित्रहरूले सजाइनेछ । खासगरी टावरबाट अवलोकन हुने हिमशृङ्खला, पालिकाका पर्यटकीय स्थान, मठमन्दिर, मूर्तिकृति र जैविक वस्तुको चित्र बनाइनेछ ।
भ्यू टावर निर्माणपछि सिङ्गो लिम्चुङबुङ गाउँपालिका विद्यार्थी र आन्तरिक तथा बाह्य पर्यटकका लागि अध्ययनको थलो बन्ने दाबी गरिएको छ ।
सांस्कृतिक, प्राकृतिक, भाषा, भेषभूषा र जैविक विविधताको हिसाबले रमणीय र अध्ययनको केन्द्रबिन्दु बन्ने प्रशासकीय अधिकृत भक्त राईले बताएका छन् । भ्यूटावर निर्माणका लागि गाउँपालिकाले दुई करोड बजेट विनियोजन गरेको जनाएको छ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
