मलेसियामा जारी एसिसी यू–१९ एसिया कपमा नेपालले भारतविरूद्ध ऐतिहासिक जित हात पारेको छ।
कप्तान दीपेन्द्र सिंह ऐरीको अलराउण्ड प्रदर्शनले नेपालले भारतलाई १९ रनले हराउँदैं इतिहास रचेको हो।
नेपालको ऐतिहासिक र महत्वपूर्ण जितमा कप्तान दिपेन्द्र सिंह ऐरीले अलराउन्डर प्रदर्शन गरे । ब्याटिङमा ८८ रन बनाएका कप्तान ऐरीले बलिङमा भारतको ४ विकेट झारेका थिए ।
नेपालले दिएको १ सय ८६ रनको लक्ष्य पछ्याएको भारत ४८.८ ओभरमा १ सय ६६ रन बनाएर अलआउट भयो।
भारतका लागि हिमांशु रानाले ४६ रन बनाए पनि टिमलाई जित दिलाउन सकेनन् । यस्तै भारतका मन्जोत कलराले ३५ रन बनाए । अभिषेक शर्माले २७ र अनुज रावतले १८ रन बनाउँदा अन्य ब्याट्सम्यानले राम्रो प्रदर्शन गर्न सकेनन् ।
नेपालका लागि पवन सर्राफ र शाहव आलमले समान २–२ विकेट लिए । त्यस्तै कमल सिंह ऐरी र सन्दिप लामिछाने समान १–१ विकेट लिए ।
यसअघि टस हारेर पहिले ब्याटिङको निम्तो पाएको नेपालले निर्धारित ५० ओभरमा ८ विकेट गुमाएर १ सय ८५ रन बनाएको थियो । नेपालको इनिङ्समा कप्तान दिपेन्द्र सिंह ऐरीले सर्वाधिक ८८ रनको इनिङ्स खेले । ओपनर जितेन्द्र सिंहले ३६ रन बनाएका थिए । भीम सार्कीले १५ रन बनाउँदा अन्य ब्याट्सम्यानले दोहोरो अंक छुन सकेनन् ।
भारतका आदित्य थकारेले ४ विकेट लिएका थिए । विवेकानन्द तिवारीले ३ तथा शिव सिंह र अभिषेक शर्माले समान २–२ विकेट हात पारेका थिए । मन्दिप सिंह, शिव सिंह र आथरभा तैडेले समान १–१ विकेट हात पारेका थिए ।
जितसँगै नेपालले अर्काे चरण प्रवेश गर्ने सम्भावना बलियो बनाएको छ । नेपाल आफ्नो पहिलो खेलमा बंगलादेशसँग २ विकेटले पराजित भएको थियो । नेपालले अब आफ्नो अन्तिम खेलमा आयोजक मलेसियासँग खेल्न बाँकी छ । नेपाल र मलेसियाबीचको खेल मंगलबार हुँदैछ .
