९ मंसिर २०८१, आईतवार
२०७५ आश्विन १५ गते, सोमबार १५:५१ मा प्रकाशित
नेपाल बंगलादेशमा जारी एसीसी यू-१९ एसिया कप क्रिकेटको समूह चरणबाटै बाहिरिएको छ । सोमबार टेष्ट राष्ट्र अफगानिस्तानसंग ३ विकेटले पराजित हुँदै नेपाल एक खेल अगावै प्रतियोगिताबाट बाहिरिएको हो ।
क्रिरा शिख मैदानमा नेपालले दिएको १३२ रनको लक्ष्य अफगानिस्तानले ३७ ओभर ३ बलमा ७ विकेट गुमाएर पुरा गर्यो । अफगानिस्तानका लागि कप्तान रहमानउल्लाह गुर्बाजले २६ रन जोड्दा अजमातुल्लाह ओमरजाईले २३ रन जोडे । नेपालका सुर्य तामाङले ४ विकेट लिए ।
यसअघि टस जितेर पहिले ब्याटिङ गरेको नेपालले ३८ ओभर ३ बलमा अलआउट हुँदै १३१ रन बनाएको थियो । नेपालका लागि रोहित कुमार पौडेलले ४९ रन जोडपनि टोलीको उच्च स्कोर बन्न सकेन । रोहित मात्र १ रनमा अर्धशतक बनाउन चुकेका थिए ।
यस्तै नेपालका लागि राशिद खानले २९ तथा कप्तान आसिफ शेखले २० रन जोडे । ऋत गौतमले १० रन जोड्दा नेपालका अन्य ब्याट्सम्यानले दोहोरो अंक जोड्न सकेनन् ।
नेपाललाई सस्तैमा समेट्न अफगानिस्तानका अजमातुल्लाह ओमरजाईले ४ विकेट लिए । कैस अहमद र अब्दुल रहमानले २/२ विकेट लिए ।
समूह ‘ए’ मा रहेका नेपाल पहिलो खेलमा भारतसंग १ सय ७१ रनले पराजित भएको थियो । अब नेपालले मंगलबार युएईसंग खेल्ने छ ।
अंक तालिकामा नेपाल र युएईले खाता खोल्न सकेका छैनन् । भारत र अफगानिस्तान समान ४/४ अंक जोडेर सेमिफाइनलमा प्रवेश गरेको छ ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
