डुङ्गा दुर्घटनालाई पुल निर्माणसँग नजोड्न आग्रह

होमल्याण्ड खबर

२०७५ आश्विन १६ गते, मंगलवार १२:३० मा प्रकाशित

रौतहट जिल्लाको लालबकैया नदीमा निर्माणाधीन पुलको विषयमा विभिन्न सञ्चारमाध्यमा पप्पु कन्स्ट्रक्सन कम्पनीको नाम जोडेर आइरहेका समाचारप्रति आफ्नो गम्भीर ध्यानाकर्षण भएको नेपाल निर्माण व्यवसायी महासंघले जनाएको छ । रौतहटको टिकुलियामा भएको दुःखद डुङ्गा दुर्घटना र त्यसबाट हुन गएको मानवीय क्षतिले महासंघलाई समेत स्तब्ध बनाएको महासचिव रोशन दाहालद्धारा जारी विज्ञप्तिमा उल्लेख छ । तर, मानवीय जीवन र सम्वेदनासँग जोडिएको विषयलाई पुल निर्माण कार्यसँग जोडेर समाचार प्रकाशनमा गरिएकोप्रति आफ्नो विमति रहेको महासंघको भनाइ छ । उक्त पुल निर्माणका लागि ३ वर्षभित्र काम सक्ने गरी २०७१ साल असारमा सम्झौता भएको चार महिनासम्म पनि साइट उपलब्ध नभएको महासंघले जनाएको छ ।

भदौ ११ गते भएको दुर्घटनालाई लिएर महासंघले असोज १४ गते मात्रै विज्ञप्तीमार्फत ध्यानार्कषण गरेको हो । उक्त विज्ञप्तीमा पुलका लागि उपलब्ध गराउने जग्गाको विवादमै चार महिना बितेको र २०७२ साल बैशाखको भूकम्पले गर्दा निर्माण कार्य रोक्न सडक विभागबाट सूचना प्रकाशित भएको थप ४ महिना सम्म पनि साइट उपलब्ध नहुँदा काम अवरुद्ध भएको जनाइएको छ । त्यस लगत्तै निर्माण सामग्रीको अभाव र ८ महिना लामो मधेस आन्दोलनका कारण काम अघि बढ्न नसकेको महासंघले जनाएको छ । महासंघका अनुसार पर्याप्त रकम विनियोजन भएमा निर्माण कम्पनीले ६ महिना थप अवधिमा निर्माण सम्पन्न गर्ने प्रतिबद्धता जनाएको छ ।

१५ करोड रुपैयाको योजनामा हाल सम्म ६ करोड मात्र बजेट विनियोजन भएको हुँदा रकम अभावका कारणले काम प्रभावित भएको पनि महासंघद्धारा जारी विज्ञप्तिमा उल्लेख छ । पुल निर्माण कार्य सुरु हुनुभन्दा पहिलेदेखि नै उक्त खोलामा डुङ्गा सञ्चालन हुने गरेको र दुर्घटनाको प्रकृति हेर्दा माझीले पुलको दक्षिणतर्फबाट डुङ्गा तार्नुपर्नेमा पुलको उत्तरतिरबाट तार्न खोज्दा पानीको बहावले डुङ्गा पल्टाएर पुलको पिलरमा ठोक्किन गएको देखिने जनाइएको छ ।

यसरी खोलामा भएको दुर्घटनामा पुल निर्माणको जिम्मा लिएको कम्पनीलाई दोषी देखाउन खोज्नु आफूैंमा पूर्वाग्रह प्रेरित देखिने महासंघले जनाएको छ । सडक विभागको प्रक्रियागत र परिस्थितिजन्य कारणले हुन गएको ढिलाइ नदेखे झै गरी निर्माण कम्पनीको टाउकोमा दोष खन्याउने काम न्यायोचित नभएको भन्दै महासंघले मुलुक निर्माणमा होमिएका १२ हजार ५ सय भन्दा बढी निर्माण व्यवसायीहरुलाई हतोत्साहित नपार्न अग्रह गरिएको छ ।

जारी विज्ञप्तिमार्फत, महासंघले सत्य तथ्य बुझेर मात्र समाचार सम्प्रेषण गरिदिन सम्बन्धित् सबै संचार माध्यमलाई अनुरोध गरेको छ ।

सम्बन्धित खबर

एमालेले लिन मानेन काठमाडौं महानगरको जरिवाना पत्र

रविमाथि अनुसन्धान गर्न १५ दिन म्याद थप

प्रतिनिधिसभाका सचिव अधिकारीले ५ महिना नपुग्दै दिए राजीनामा

सिनामंगलको होटलमा युवायुवती झुण्डिएको अवस्थामा मृत भेटिए

रवि लामिछानेलाई अदालत उपस्थित गराइयो

कमजोरी सच्याउन एमाले तयार छ : शङ्कर पोखरेल