लगानी सम्मेलनअघि नै आकर्षक नीति र कानुन निर्माणको काम सम्पन्न गर्न निर्देशन

होमल्याण्ड खबर

२०७५ मंसिर १० गते, सोमबार १०:३४ मा प्रकाशित

लगानी बोर्ड बैठकले आगामी मार्चको अन्तिम साता गर्न लागेको लगानी सम्मेलनअघि नै लगानी आकर्षक गर्न आवश्यक नीति तथा कानुन निर्माण तथा संशोधनको काम सम्पन्न गर्न निर्देशन दिने निर्णय गरेको छ । प्रधानमन्त्री एवं बोर्डका अध्यक्ष केपी शर्मा ओलीकोको अध्यक्षतामा आइतबार बसेको बैठकले सम्मेलनअघि नै आवश्यक नीति तथा कानुन निर्माण गर्न सम्बद्ध निकायलाई निर्देशन दिने निर्णय गरेको हो ।

बोर्डले सम्मेलनलाई थप सहभागितामूलक र प्रभावकारी बनाउन विदेशस्थित नेपाली नियोगहरू समेत परिचालन गर्न निर्देशन दिने निर्णय पनि गरेको छ ।मार्च २०१९ को अन्तिम साता हुने सम्मेलन आयोजना गर्न अर्थमन्त्री तथा बोर्डका उपाध्यक्ष डा. युवराज खतिवडाको संयोजकत्वमा निर्देशक समिति गठन गर्ने निर्णय गरेको छ । दुई वर्षअघि पनि लगानी बोर्ड र उधोग मन्त्रालयको सहकार्यमा लगानी सम्मेलन भएको थियो भने सम्मेलनमा १४ खर्बको प्रतिवद्धता आएको थियो । तर, अधिकांश लगानी भने हालसम्म प्रतिबद्धतामै सीमित छ । बोर्डले आगामी सम्मेलनमा भने परियोजनाहरूको प्रारम्भिक अध्ययन भएका आयोजनाहरू प्रस्तुत गर्ने तथा सम्मेलनकै क्रममा इच्छुक लगानीकर्तासँग प्रारम्भिक सम्झौता गर्नेगरी प्रक्रिया अघि बढाएको जनाएको छ ।

सम्मेलनमा ऊर्जा, पूर्वाधार, कृषि, पर्यटनका साथै हालै बोर्डले प्रदेशहरूसँग गरेको छलफलको आधारमा तय भएका उत्कृष्ट परियोजनाहरू प्रस्तुत गर्ने भएको छ । बैठकले बोर्डका कामकारवाहीलाई थप प्रभावकारी बनाउन ‘लगानी बोर्ड ऐन २०६८’ अनुसार अर्थमन्त्री एवं बोर्ड उपाध्यक्ष खतिवडाको संयोजकत्वमा लगानी परामर्श समिति गठन गर्ने निर्णय गरेको छ । बैठकले ग्रीड कनेक्टेड सोलार फोटो भोल्टाइक प्रोजेक्ट प्लस ब्याट्री स्टोरेज आयोजनालाई सार्वजनिक निजी साझेदारी (पीपीपी) मोडेलमा अघि बढाउन सौर्य ऊर्जा उत्पादनका लागि सर्भेक्षण अनुमति दिने निर्णय गरेको छ ।

बोर्डका प्रवक्ता उत्तम वाग्लेका अनुसार डोल्मा फण्ड म्यानेजमेन्टलाई मुस्ताङको लोमान्थाङमा १ सय ५० मेगावाट र रसुवाको चिलिमेमा १ सय २५ मेगावाट क्षमताकोे उत्पादनका लागि अनुमति दिइएको हो । बैठकमा प्रधानमन्त्री ओलीले लगानीको वातावरण सुधार्न सरकार प्रतिवद्ध रहेको उल्लेख गर्दै ठूला पूर्वाधार तथा अन्य आयोजनाको कार्यान्वयन समयमै सम्पन्न गर्न सरकारको सम्बद्ध निकायलाई गम्भीर भएर अघि बढ्न निर्देशन दिएका थिए । बैठकमा बोर्डले अघि बढाएका आयोजनाबारे प्रमुख कार्यकारी अधिकृत महाप्रसाद अधिकारीले जानकारी दिएका थिए ।

सम्बन्धित खबर

चुडामणिको मुद्दामा विपक्षी झिकाउन सर्वोच्चको आदेश

सर्वोच्चको बोर्डमा कालो रङ छ्यापेकी बिनु यादव प्रहरी नियन्त्रणमा

२ हजार ६ सय रुपैयाँले घट्यो सुनको मूल्य

रबि लामिछानेलाई आज काठमाडौं ल्याईदै

चीन भ्रमणमा ऋणसम्बन्धी कुनै सम्झौता गर्दैनौँ : प्रधानमन्त्री

मन्त्रिपरिषद् बैठक बस्दै