मुख्यमन्त्री अत्यावश्यक सेवा केन्द्रको शिलान्यास

होमल्याण्ड खबर

२०८१ पुष २ गते, मंगलवार १४:०२ मा प्रकाशित

मोरङको रङ्गेली नगरपालिकामा रु साढे नौ करोड लगानीमा मुख्यमन्त्री अत्यावश्यक सेवा केन्द्रको शिलान्यास गरिएको छ ।

रङ्गेली–८ स्थित दर्वेशामा निर्माण हुने उक्त केन्द्रको जिल्ला समन्वय समितिका उपप्रमुख उषा झा ठाकुर, रङ्गेलीका नगरप्रमुख दलिप बगडिया, सुनवर्षी नगरपालिकाका नगरप्रमुख श्यामप्रसाद राजवंशी, धनपालथान गाउँपालिकाका अध्यक्ष जीवछ गच्छदार, कानेपोखरी गाउँपालिकाका अध्यक्ष राजमती इङ्नामले संयुक्त रुपमा शिलान्यास गर्नुभएको हो ।

सो अत्यावश्यक सेवा केन्द्रको शिलान्यास गर्दै केन्द्रमा जनशक्ति, उपकरण र विपद् व्यवस्थापनका लागि आवश्यक सबै स्रोतसाधन उपलब्ध रहने जिल्ला समन्वय समिति उपप्रमुख ठाकुरले बताउनुभयो । रङ्गेली र सुनवर्षी नगरपालिका तथा धनपालथान र कानेपोखरी गाउँपालिकालाई लक्षित गरी निर्माण हुने केन्द्रले विपद् व्यवस्थापनका लागि एकीकृत रुपमा सञ्चालन हुने रङ्गेलीका उपप्रमुख भुमा पराजुलीले बताउनुभयो ।

केन्द्र निर्माणका लागि आन्तरिक मामिला तथा कानुन मन्त्रालय कोशी प्रदेश सरकारले एक वर्षअघि त्रिपक्षीय सम्झौता गरेको थियो । रङ्गेली नगरपालिकाले रु दुई लाख २५ हजार प्रतिकट्ठाका दरले दर्वेशामा १२ कट्ठा जग्गा खरिद गरेको थियो ।

प्रदेश सहयोग कार्यक्रमको रु दुई करोड, कोशी प्रदेश सरकारको आन्तरिक तथा कानुन मन्त्रालयको रु छ करोड २५ लाख २९ हजार र चारवटै पालिकाबाट रु एक  करोड ८५ लाखको लगानीमा निर्माण हुने भएको छ । सेवा केन्द्र एक वर्षभित्र सम्पन्न गर्नेगरी ब्राइट बुल निर्माण सेवाले ठेक्का पाएको छ ।

सम्बन्धित खबर

सुदुरपश्चिमलाई १४० रनको लक्ष्य

युएईका राजदूत र प्रधानमन्त्रीविच भेटवार्ता

विपद् प्राधिकरणको कार्यकारी प्रमुखका लागि १६ जनाको आवेदन (सूचीसहित)

रविलाई अमर्यादित व्यवहार भएको छैन, गलत प्रचार भयो : गृहमन्त्री लेखक

चितवनलाई हराउँदै कर्णाली क्वालिफायर टु मा

बार अध्यक्षविरुद्धको अदालतको अवहेलनाको पेसी ३२ औ नम्बरमा