पठाओ राइडर बन्न अब अनिवार्य परीक्षा दिनुपर्ने

होमल्याण्ड खबर

२०८२ मंसिर ३ गते, मंगलवार ११:०९ मा प्रकाशित

राइड सेयरिङ सेवा प्रदायक पठाओ नेपालले अब आफ्नो राइडरहरुका लागि अनिवार्य परीक्षाको व्यवस्था गरेको छ । राइडर छनोट र तालिम प्रक्रियालाई अझ सुदृढ बनाउँदै, राइडर बन्न चाहनेहरूका लागि अनलाइन प्रशिक्षण र परीक्षा अनिवार्य गरेको कम्पनीले जनाएको छ ।

कम्पनीका अनुसार, सुरुदेखि नै कक्षामा बसेर प्रशिक्षण दिने अभ्यास निरन्तरता दिँदै आएको थियो भने पठाओ नेपालको सेवा देशभर फैलिँदै गएसँगै काठमाडौँ बाहिरका चालकहरूलाई लक्षित गर्दै यो प्रक्रिया क्रमशः डिजिटल प्रणालीमा रूपान्तरण गरिएको छ ।

पठाओकी निर्देशक सुरक्षा हमालका अनुसार राइडर बन्नका लागि ब्लुबुक, सवारी चालक अनुमतिपत्र (लाइसेन्स) र तेस्रो पक्ष बीमा अनिवार्य छ । त्यसपछि एपमा रहेको लर्निङ म्यानेजमेन्ट सिस्टम (एलएमएस)मार्फत अनलाइन प्रशिक्षण सञ्चालन हुनेछ । सो प्रशिक्षणपछि लिइने परीक्षामा परीक्षार्थिले कम्तीमा ८० प्रतिशत अंक ल्याउनुपर्नेछ । तथापि, असफल भएकाहरूले भोलिपल्ट पुनः प्रशिक्षण लिएर पुनः परीक्षा दिन सक्नेछन् ।

यसले राइडर बन्ने प्रक्रियालाई अझ पारदर्शी र सजिलो बनाउँदै यात्रालाई पूर्ण रूपमा डिजिटल बनाउने लक्ष्य राखेको छ । इच्छुकहरूले पठाओ ड्राइभ एप डाउनलोड गरी अनलाइनमार्फत दर्ता प्रक्रिया सुरु गर्न सक्नेछन् ।

ड्राइभ एपमा खाता खोली आवश्यक कागजातहरू अपलोड गरिसकेपछि पठाओको कार्यालयले ती कागजातहरूको जाँच गर्नेछ र सबै कागजात सही भएमा २४ घण्टाभित्र खाता प्रमाणीकरण हुने कम्पनीले जनाएको छ ।

त्यसपछि, पठाओ ड्राइभ एपमार्फत नै अनलाइन प्रशिक्षण लिन सकिनेछ । प्रशिक्षण पूरा भइसकेपछि परीक्षामा सामेल हुन पाइनेछ । जुन पठाओ एपबाट नै दिन सकिन्छ । उक्त परीक्षामा ८० प्रतिशत वा सोभन्दा बढी अङ्क प्राप्त गरेपछि सम्बन्धित व्यक्तिलाई एसएमएस मार्फत सम्झौतापत्र पठाइनेछ । र, सम्झौतापत्रमा हस्ताक्षर गरिसकेपछि आधिकारिक रूपमा पठाओ चालक (राइडर) बन्न सकिन्छ ।

हमालले भनिन्, ‘हाम्रो लागि सुरक्षा वैकल्पिक कुरा नभई सेवाको मेरुदण्ड हो । ८० प्रतिशत अंक ल्याएर पास हुने यो प्रणालीले हाम्रो ‘सुरक्षा र जिम्मेवार सेवा’को मानकलाई अझ मजबुत बनाउनेछ । यसले ग्राहकहरूलाई सुरक्षित, भरपर्दो र पेशागत अनुभव सुनिश्चित गर्नेछ ।’

कम्पनीको तथ्यांङअनुसार परीक्षामा लगभग ८५ प्रतिशत सहभागी पहिलो प्रयासमै उत्तीर्ण हुनेछ र बाँकीले पुनः परीक्षा दिएर उत्तीर्ण भएको देखिएको छ । यसका साथै सक्रिय पठाओ राइडरहरूले मासिक औसत ४०–५० हजार रुपैयाँसम्मको आम्दानी गर्ने गरेको समेत तथ्यांङ्कले देखाएको छ ।

डिजिटल प्रणाली आएपछि नयाँ दर्ता हुने चालकहरूमा उत्साहजनक सहभागिता देखिएको बताउँदै हमालले भनिन्, ‘हरेक यात्रा सुरक्षित, भरपर्दो र जिम्मेवार बनाउनका लागि हामीले सुरुवाती चरणमै राइडरहरूको मूल्या‌ंकन लाई अझ व्यवस्थित र प्रभावकारी बनाएका छौँ ।’

सम्बन्धित खबर

गजेन्द्रनारायण सिंह अस्पतालमा आगलागी, विरामी भागाभाग

लमजुङमा नौ उम्मेदवारको जमानत जफत

गोरखा- १ मा सुधन गुरुङको दोब्बर मतको अग्रता कायमै

सुनचाँदीको मूल्य बढ्यो, कतिमा हुँदैछ कारोबार?

जाँचबुझ आयोगले सरकारलाई प्रतिवेदन बुझायो

विजयी र्‍याली नमनाउन रास्वपाको अपिल