२३ फाल्गुन २०८२, शनिबार
२०८२ पुष १ गते, मंगलवार १३:४४ मा प्रकाशित
नेकपा एमालेको नेतृत्व छनोटका लागि मंगलबार अपराह्न ४ बजेदेखि मतदान सुरु हुने भएको छ । महाधिवेशन बन्दसत्र हल भृकुटीमण्डपमा विद्युतीय मेशिनबाट हुने मतदानका लागि आवश्यक तयारी पूरा भएको छ ।
दिउँसो १ बजेदेखि नै मतदान सुरु हुने भनिएपनि प्राविधिक कुराहरू मिलाउनुपर्ने भएकाले निर्धारित कार्यतालिका सरेको रामलक्ष्मण भोटिङ मेशिनका प्राविधिक नवराज पाण्डेले जानकारी दिए ।
पार्टीको ११औँ महाधिवेशनमा सहभागी हुन देशभरबाट दुई हजार २६३ जना प्रतिनिधि सहभागी भएका छन् । महाधिवेशनले १९ जना पदाधिकारी, ३०१ जना केन्द्रीय सदस्य र केन्द्रीय निकायका पदाधिकारी गरी ३५१ जना नयाँ नेतृत्व चुनिँदैछन् ।
चुनावी प्रतिस्पर्धामा अध्यक्ष केपी ओली र वरिष्ठ उपाध्यक्ष ईश्वर पोखरेले प्यानलै बनाएर प्रतिस्पर्धामा उत्रिएका छन् । दुवै पक्षका गरी करिब सात सयभन्दा बढी उम्मेदवार प्रतिस्पर्धामा उत्रिएका छन् । प्राविधिक पाण्डेका अनुसार मतदानस्थलमा ८० वटा भोटिङ मेशिन राखिएको छ । एक जना प्रतिनिधिलाई मतदान गर्न करिब ३५ देखि ४० मिनेट समय लाग्ने उनले स्पष्ट पारे ।
‘दुवै पक्षका गरेर लगभग सात सय जना उम्मेदवार हुनुहुन्छ । साक्षर भएका प्रतिनिधिले आफ्ना उम्मेदवारलाई चिन्नुहोला र अलि छिटो होला । साक्षरता नभएका उम्मेदवारलाई राम्रोसँग नचिनेका प्रतिनिधिलाई अलि बढी समय लाग्छ । जसले पढेको छ, उम्मेदवारलाई राम्रोसँग चिनेका छन्, उसले २० मिनेटमा पनि सक्नुहुन्छ । ढिलो गर्नेले ४०–४५ मिनेट लागेको हाम्रो पहिलाको अनुभव छ’, रातोपाटीसँग उनले भने ।
मतदान गर्ने समय लम्बिनुको मुख्य कारण उम्मेदवार धेरै भएको र प्रतिनिधिको साक्षरता भएको पाण्डेले बताए ।
उनले भने, ‘प्रतिनिधिले सबै उम्मेदवारको नाम पढ्नुहुन्छ । मेशिनमा फोटो आउँछ । त्यसमा छुट्टा छुट्टै प्यानल आउँदैन । त्यसकारण यी सबै कुरालाई ध्यान दिँदा औसतमा ३५ देखि ४० मिनेट समय लाग्ने अनुमान गरेका छौँ ।’
करिब ४० मिनेटमा ८० जनाले एक पटकमा मतदान गर्न सक्ने भएकाले कम्तीमा १८ घण्टा समय लाग्ने उनको भनाइ छ ।
‘कुनै बेला मेशिन खाली भइदिन्छ । कोही बेला म अलि पछि गरौँला भन्नुहुन्छ । यी सबै कुरालाई धानमा राखी २० देखि २४ घण्टामा मतदान सकिन्छ । त्यसपछि लगत्तै मतगणना सुरु हुन्छ । मेशिनले तत्कालै परिणाम दिने भए पनि सबै मेशिनबाट छुट्टा छुट्टै मत सङ्कलन गर्नुपर्ने भएकाले डेडदेखि तीन घण्टामा अन्तिम परिणाम सार्वजनिक हुने पाण्डेले जानकारी दिए ।
उनले भने, ‘एक मेशिन र अर्को मसिनबिच नेटवर्किङ छैन । त्यसले गर्दा प्रत्येक एक एक मेशिनको मत गन्नुपर्छ । सबै मेशिनको मत जोड्दा समय लाग्छ । एउटा मसिनमा आएको कुल सङ्ख्या र अर्को मसिनमा आएको जम्मा सङ्ख्या जोडेर अन्तिम परिणाम सार्वजनिक हुन्छ । त्यसो गर्दा कम्तीमा डेढ दुई र ढिलोमा तीन घण्टा लाग्छ ।’
मतदान सम्बन्धमा नेतृत्वबाट कुनै रोक्ने आदेश भएन भने आज रातभरीमा मतदान सकिने र भोलि दिउँसोसम्म अन्तिम परिणाम सार्जजनिक हुने पाण्डेले बताए ।
होमल्याण्ड मिडिया दशक पुरानो संचार संस्था हो । रियल स्टेट तथा सहरीकरणका बिषयमा केन्द्रित यस संस्थाले म्यागेजिन,बुकलेट प्रकाशन, अडियो—भिडियो, इभेन्ट...Read More
